રાજ્યમાં લાખોનો વિદેશી દારુ ઘુસાડવા બુટલેગરે બટાટાનો એવો ઉપયોગ કર્યો કે, પોલીસને ધોળે દિવસે અંધારા આવી ગયા

રાજકોટ(ગુજરાત): આજકાલ રાજ્યમાં પોલીસ દ્વારા સતત દારૂની હેરાફેરી કરતા બુટલેગરોને પકડી પાડવામાં આવી રહ્યા છે. બુટલેગરો દારૂની હેરાફેરી કરવા માટે ઘણા કીમિયા અપનાવતા હોય છે. આ દરમિયાન, રાજકોટના એરપોર્ટ પોલીસ સ્ટેશન વિસ્તારમાંથી સ્ટેટ મોનિટરીંગ સેલ દ્વારા લાખો રૂપિયાનો દારૂ ઝડપી પાડવામાં આવ્યો છે. જાણવા મળ્યું છે કે, 950 કિલો બટેટાની આડમાં લાવવામાં આવી રહેલો દારૂ સ્ટેટ મોનિટરીંગ સેલ દ્વારા ઝડપી પાડવામાં આવ્યો છે. મોનિટરીંગ સેલ તરફથી 9.43 લાખનો મુદ્દામાલ કબ્જે કરી સમગ્ર મામલાની તપાસ એરપોર્ટ પોલીસને સોંપવામાં આવી છે.

મળતી માહિતી મુજબ, સ્ટેટ મોનિટરીંગ સેલ દ્વારા રાજકોટના એરપોર્ટ પોલીસ સ્ટેશન વિસ્તારમાં આવેલ કુચીયાદડ પાસેની હોટલ નજીકથી એક બોલેરો પીકઅપ વાનમાંથી 5,837 દારૂની બોટલ ઝડપી પાડવામાં આવી છે. દારૂની હેરાફેરી સહેલાઇથી થઇ શકે તેમજ પોલીસથી બચી શકાય તે માટે દારૂને બટેટાની આડમાં ભરીને લાવવામાં આવી રહ્યો હતો.

આ સમગ્ર મામલે સ્ટેટ મોનિટરીંગ સેલના PSI એસ.આર. શર્મા અને તેમની ટીમને બાતમી મળી હતી કે, રાજકોટના કુચીયાદળ નજીક આવેલી ઇન્ડિયા હોટલ પેલેસ ખાતે દારૂ ભરેલી બોલેરો પીકઅપ વાન પડી છે. જે બોલેરો ગાડીમાં જંગલેશ્વરના આરીફ ઉસ્માન નામના બુટલેગરનો દારૂનો જથ્થો પડ્યો છે. બાતમીના આધારે સ્ટેટ મોનિટરીંગ સેલ દ્વારા દરોડો પાડવામાં આવતા બોલેરોમાંથી 950 કિલો બટેટાની આડમાં છૂપાવેલ દારૂની 5,837 બોટલ મળી આવી હતી. હાલ સમગ્ર મામલે જે બુટલેગરનું નામ ખુલ્યું છે તેની શોધખોળ શરૂ કરી હોવાનું સામે આવ્યું છે.