ગુજરાતના વિધાર્થીઓ માટે એક કરોડ સુધીના ઈનામો જીતવાની સુવર્ણ તક- રાજ્ય સરકારે કર્યું ક્વિઝ સ્પર્ધાનું આયોજન

ગુજરાત(Gujarat): રાજ્ય સરકારના વિજ્ઞાન અને પ્રૌદ્યોગિકી વિભાગ(DST) હેઠળના ગુજરાત કાઉન્સિલ ઓન સાયન્સ એન્ડ ટેકનોલોજી(GUJCOST)-ગાંધીનગર દ્વારા ધો.૯ થી ૧૨માં અભ્યાસ કરતા વિદ્યાર્થીઓ માટે સાયન્સ, ટેકનોલોજી, એન્જિનીયરિંગ અને મેથેમેટિક્સ(STEM) કવિઝ સ્પર્ધા યોજાશે. સ્પર્ધામાં સૌપ્રથમ ઓનલાઈન માધ્યમથી જિલ્લા કક્ષાએ અને ત્યારબાદ રાષ્ટ્રીય વિજ્ઞાન દિવસ (૨૮- ફેબ્રુઆરી-૨૦૨૨)ના રોજ ગુજરાત સાયન્સ સિટી ખાતે ફાઈનલ સ્પર્ધા યોજાશે. જેમાં ટોચના એક હજાર વિદ્યાર્થીઓને ગુજરાત સાયન્સ સિટી ખાતે નિ:શુલ્ક ટૂર કરાવવામાં આવશે.

વિજેતા વિદ્યાર્થીઓને રૂ.૧ કરોડ સુધીના ઈનામો પુરસ્કારરૂપે આપવામાં આવશે. રાજ્ય કક્ષાએ વિજેતા ટીમને ટચ સ્ક્રીન આઈ-૫ લેપટોપ તેમજ રનર અપ ટીમને આઈ-૫ લેપટોપ આપવામાં આવશે. જ્યારે ભાગ લેનારી બાકીની ૪ ટીમને આઈ-૩ લેપટોપ આપવામાં આવશે. જિલ્લા કક્ષાએ વિજેતા ટીમને ઈનામરૂપે આઈપેડ અપાશે. રાજ્ય કક્ષાની ટોપ ૫ ટીમોને ઈસરો, DRDO, TIFAC જેવી પ્રતિષ્ઠિત સંશોધન સંસ્થાઓની મુલાકાતે લઈ જવામાં આવશે. ભાગ લેનારા તમામ સ્પર્ધકોને ડિજિટલ પ્રમાણપત્ર એનાયત આપવામાં આવશે.

આ સ્પર્ધામાં એક શાળામાંથી વધુમાં વધુ વિદ્યાર્થીઓ ભાગ લઈ શકશે. જેમાં ભાગ લેવા માટે તા.૧૯ જાન્યુ.૨૦૨૨ સુધીમાં વેબસાઈટ https://gujcost.gujarat.gov.in આ વેબસાઈટ પર રજીસ્ટ્રેશન કરાવવું ફરજીયાત છે. આ સ્પર્ધા ગુજરાતી અને અંગ્રેજી એમ બને ભાષામાં રહેશે. રજિસ્ટર્ડ વિદ્યાર્થીઓને સોફ્ટ કોપીમાં પ્રશ્નબેંક પણ આપવામાં આવશે. સુરત જિલ્લામાંથી ભાગ લેવા માંગતા વિદ્યાર્થીઓને આ ક્વિઝ વિષે વધુ માહિતી માટે મેળવવા માટે જયભારતી જિલ્લા લોક વિજ્ઞાન કેન્દ્ર (csc) -સુરતના ડાયરેકટરશ્રી જી.એન. કાકડિયા(મો.૭૫૬૭૯૨૪૫૦૧) વિધિ લીલા( મો.૭૦૯૬૭૭૯૯૫૩) અથવા પિનાકીન પુરાણિક (મો.૮૮૬૬૫૩૧૮૮૧) નો સંપર્ક કરવા જણાવાયું છે.