ATS ટીમે 5 કરોડના ડ્રગ્સ સાથે અમદાવાદ આવી રહેલ આરોપીની કરી ધરપકડ- પુછપરછમાં થયો ચોંકાવનાર ખુલાસો

પ્રતિબંધ હોવાં છતાં સોશિયલ મીડિયા પર અવારનવાર ડ્રગ્સની તેમજ એની હેરાફેરી કરી રહેલ આરોપીની ધરપકડ કરવામાં આવી એવાં સમાચાર સામે આવતા હોય છે ત્યારે હાલમાં પણ આવાં જ એક સમાચાર સામે આવ્યા છે. ગુજરાત ATSની ટીમ દ્વારા લગભગ 5 કરોડની કિંમતના ડ્રગ્સના જથ્થાની સાથે એક ઈસમની ધરપકડ કરવામાં આવી છે.

આરોપી મુંબઈથી ડ્રગ્સ લઈને અમદાવાદ આવી રહ્યો હતો. ATSની ટીમ દ્વારા વોચ ગોઠવીને આરોપીને શાહીબાગ વિસ્તારથી પકડી પાડવામાં આવ્યો હતો તથા ડ્રગ્સ સહિતનો મુદ્દામાલ જપ્ત કરી લેવામાં આવ્યો છે. આટલા ડ્રગ્સની કિંમત આંતરરાષ્ટ્રીય બજારમાં 5 કરોડની આસપાસ હોવાંનું જણાઈ રહ્યું છે. આની સાથે જ વધુ પૂછપરછ હાથ ધરવામાં આવી છે.

બે ખાખી સેલોટેપથી વીંટાડેલાં પડીકામાંથી મળ્યો 5 કરોડનો ડ્રગ્સ :
ગુજરાત ATS ટીમને મળેલ બાતમી પ્રમાણે, મુંબઈનો સુલ્તાન શેખ નામનો વ્યક્તિ ગેરકાયદેસર રીતે મુંબઈથી એક બેગમાં ડ્રગ્સનો મોટો જથ્થો લઈને આવી રહ્યો છે. મળેલ બાતમીને આધારે શાહીબાગ વિસ્તારમાં વોચ ગોઠવવામાં આવી હતી.

થોડા સમય પછી એક ઈસમ ત્યાંથી પસાર થતાં તેને ઊભો રાખીને પૂછપરછ હાથ ધરવામાં આવી હતી. ત્યારપછી તેની બેગ ચેકિંગ કરતાં બેગમાં કુલ 2 ખાખી સેલોટેપથી વીંટાડેલાં પડીકાં મળી આવ્યાં હતાં. પડીકાને ખોલતાં અંદરથી મેથામ્ફેટામાઈન નામનું ડ્રગ્સ હોવાનું જાણવા મળ્યું હતું.