મુખ્યમંત્રી ભૂપેન્દ્ર પટેલ જંગી લીડથી આગળ- કોંગ્રેસના ઉમેદવારે નિરાશ થઈને મતગણતરી સ્થળ છોડ્યું

ગુજરાત(Gujarat): રાજ્યની વિધાનસભા ચૂંટણી જાહેર થયાના બે મહિના પહેલા જ ચૂંટણીની જાહેરાતની ભારે ઉત્સુકતા જોવા મળી હતી. અંતે ચૂંટણીપંચ દ્વારા 3 નવેમ્બરે ચૂંટણી જાહેર કરતા તમામ લોકોની આતુરતાનો અંત આવ્યો હતો. ત્યાર બાદ 1 ડિસેમ્બરના રોજ સૌરાષ્ટ્ર-કચ્છ અને દક્ષિણ ગુજરાતની 89 સીટ પર જ્યારે 5 ડિસેમ્બરના રોજ ઉત્તર ગુજરાત અને મધ્ય ગુજરાતની 93 સીટ પર મતદાન થયું હતું. જેમાં અનુક્રમે 63.31 અને 65.30 % મતદાન થયું હતું. જેનું સરેરાશ મતદાન 64.30 % થાય છે. જે ગઈ ચૂંટણી કરતા 4 % જેટલું ઓછું ગની શકાય. જેની સવારના 8 વાગ્યાથી 37 મતગણતરી કેન્દ્રો પર 182 સીટની મતગણતરી શરૂ થઈ ગઈ છે. આ ચૂંટણી પરિણામમાં મુખ્યમંત્રી સહિત 20 મંત્રીઓ મળીને કુલ 1621 ઉમેદવારનું રાજકીય ભાવિ નક્કી થશે.

સીએમ ભૂપેન્દ્ર પટેલ જંગી લીડથી આગળ:
મહત્વનું છે કે, મતગણતરી શરૂ થતાની સાથે સીએમ ભૂપેન્દ્ર પટેલની તરફેણમાં ટ્રેન્ડ આવી રહ્યાં હતાં. શરૂઆતી બે કલાકમાં મુખ્યમંત્રી ભૂપેન્દ્ર પટેલ 23 હજાર મતોથી આગળ ચાલી રહ્યાં છે. ઉંચા માર્જિનથી અહીં ભાજપની જીત થઇ રહી હોય તેવું લાગી રહ્યું છે. આ જોતા જ કોંગ્રેસના ઉમેદવાર અમીબેન યાજ્ઞીક નિરાશ થઈને મતગણતરી સ્થળ છોડી દીધું છે.

2017ની ચૂંટણીમાં ભુપેન્દ્ર પટેલને મળી હતી જંગી લીડ:
મહત્વનું છે કે, વર્ષ 2017ની ચૂંટણીમાં ભાજપે ભૂપેન્દ્ર પટેલને ટિકિટ આપી હતી. જેઓ 1 લાખ 75 હજાર રેકોર્ડ બ્રેક મતોથી ચૂંટણી જીત્યા હતા. જ્યારે વર્ષ 2021માં ગુજરાત સરકારમાં ફેરફાર કરવામાં આવ્યો ત્યારે ભૂપેન્દ્ર પટેલને મુખ્યમંત્રી બનાવવામાં આવ્યા હતા.

સમગ્ર મતગણતરી પ્રક્રિયા દરમિયાન 182 કાઉન્ટિંગ ઓબ્ઝર્વર્સ, 182 ચૂંટણી અધિકારી અને 494 મદદનીશ ચૂંટણી અધિકારી ફરજ પર હાજર રહેશે. આ મતગણતરી હેઠળ રિટર્નિંગ ઑફિસર/આસિસ્ટન્ટ રિટર્નિંગ ઑફિસર, ઉમેદવાર-કાઉન્ટીંગ એજન્ટ્સ તથા ચૂંટણી પંચ દ્વારા નિમણૂંક પામેલા ઑબ્ઝર્વર્સની ઉપસ્થિતિમાં સ્ટ્રોંગરૂમમાંથી EVM બહાર કાઢી કાઉન્ટીંગ હોલમાં ગોઠવી દેવામાં આવ્યા છે.