ગાંધીનગરમાં નશામાં ભાન ભૂલી નરાધમે શ્વાન સાથે પાર કરી હેવાનિયતની તમામ હદો

ગાંધીનગર(ગુજરાત): દારૂના નશામાં શેરથામાં એક વ્યક્તિએ શેરીના કુતરાને ક્રૃરતાથી મારતા પોલીસ ફરિયાદ નોંધાઈ છે. આ અંગે શેરથામાં રહેતાં ગીતાબેન શૈલેષભાઈ ઠાકોરે અડાલજ પોલીસ સ્ટેશનમાં ફરિયાદ નોંધાવી છે.

તેમના ઘરની સામે રહેતાં અશોકભાઈ કાંતીજી ઠાકોર સોમવારે બપોરે 12 વાગ્યાની આસપાસ દારૂ પીને આવ્યા હતા. ગીતાબેનના ઘરની આગળ પાળેલું શેરીનું કુતરું બાંધેલું હતું. દારૂના નશામાં અશોકે શ્વાનને લાકડી વડે માર મારીને પગમાં અને આંખના ભાગે ઈજાઓ પહોંચાડી હતી. ગીતાબેન અને તેમની પુત્રીએ જયારે શ્વાનને મારવાની ના પાડી ત્યારે અશોક ઠાકોરે માતા-દીકરીને પણ ગાળો બોલીને જાનથી મારી નાખવાની ધમકી આપી હતી. અશોક ઠાકોર આસપાસના લોકો ભેગા થઈ જતાં જતો રહ્યો હતો. તેણે ધમકી પણ આપી હતી કે, ‘હવે કૂતરાને રાખશો તો તમને અહીંયા રહેવાનું ભારે પડશે’.

કૂતરાની આંખમાંથી લોહી નીકળતું હોવાથી પરિવારે એનીમલ હેલ્પલાઈનની મદદ દ્રારા તેની સારવાર કરાવી હતી. ત્યારબાદ સમગ્ર મુદ્દે પરિવારે અડાલજ પોલીસ સ્ટેશનમાં ફરિયાદ નોંધાવી હતી. જેમાં પોલીસે અશોકભાઈ કાંતીજી ઠાકોર વિરુધ પશુઓ પ્રત્યે કૃરતા પ્રતિબંધ અધિનિયમ તથા પરિવારને ગાળો બોલીને મોતની ધમકી આપવા બદલ ગુનો નોંધીને વધુ તપાસ શરુ કરી હતી.