વિકાસ થયો પણ મોંઘવારીનો…! લાલ મરચું, જીરું, કઠોળના અને રોજ વપરાતી વસ્તુઓના ભાવમાં ભડકો

ગુજરાત(Gujarat): મોંઘવારી(Inflation)ના મહામાર વચ્ચે સામાન્ય જનતાના ખિસ્સા ખાલી થઈ રહ્યા છે. શાકભાજી, દૂધ, મસાલા અને ઈંધણના ભડકે બળી રહેલા ભાવ વચ્ચે સામાન્ય જનતા પીસાઈ રહી છે.

વાત કરવામાં આવે તો ઉનાળાની શરૂઆત થતા જ ગૃહિણીઓ આખા વર્ષ માટે મસાલાઓ ભરતી હોય છે. ત્યારે હવે મસાલા ના ભાવ પણ વધી રહ્યા છે. ગૃહિણીઓએ આ વખતે એક સાથે લેવાતા મસાલા પર મજબૂરી એ કાપ મૂકવો પડે તેમ છે. કારણ કે મસાલા ના ભાવમાં 50% થી 200% સુધીનો મસમોટો વધારો થયો છે. આ ભાવ વધારાનું એકમાત્ર કારણ માવઠું હોવાનું જણાવવામાં આવી રહ્યું છે.

મહત્વનું છે કે લાલ મરચું અને જીરાના ભાવમાં ગયા વર્ષ કરતાં 50% નો વધારો થયો છે. વાત કરવામાં આવે તો ગયા વર્ષે પીસેલું મરચું 300 થી 400 રૂપિયા પ્રતિ કિલોના ભાવે મળતું હતું. અત્યારે હવે આ મરચું 500 થી 550 રૂપિયા પ્રતિ કિલો ના ભાવે મળી રહ્યું છે. સાથે જ કાશ્મીરી મરચું 550 રૂપિયાની જગ્યાએ 700 રૂપિયામાં અને રેશમ પટ્ટો મરચું 400 ની જગ્યાએ 550 રૂપિયામાં વેચાઈ રહ્યું છે. સાથે જ જીરાના ભાવ 200 રૂપિયા કિલો થી વધીને ₹400 થી 450 રૂપિયા પ્રતિ કિલોએ પહોંચી ગયા છે.

અત્રે ઉલ્લેખનીય છે કે વરસાદને કારણે શાકભાજીના ભાવ પણ આસમાને પહોંચી ગયા છે. સાથે કઠોળના ભાવ પણ વધી ગયા છે. કઠોળ અને ડાળના ભાવમાં પ્રતિ કિલો 15 થી 20 રૂપિયાનો ભાવ વધારો થયો છે. જેને કારણે સામાન્ય જનતાની ખરીદી ઘટી છે.