ગુજરાત: નરભક્ષી દીપડાથી આઠ વર્ષના બાળકને બચાવવા માતાએ જે કર્યું એ જાણી આંખો પહોળી થઇ જશે

સોશિયલ મીડિયામાં અવારનવાર કેટલીક ઘટનાઓ સામે આવતી રહેતી હોય છે. હાલમાં પણ આવી જ એક ઘટના ગુજરાતમાં આવેલ ગીર-સોમનાથ જીલ્લામાંથી સામે આવી રહી છે. ગીર-સોમનાથ જીલ્લામાં આવેલ સૂત્રાપાડા તાલુકાના બરુલા ગામમાં વાડી વિસ્‍તારમાં પોતાના ખેતરે ગઇકાલે મોડી સાંજે 8 વર્ષનાં પુત્ર તેના પિતાને ચા આપવા ગયો ત્‍યારે એક દીપડાએ હુમલો કરીને ગંભીર ઇજા પહોંચાડી હતી. ઇજાગ્રસ્‍ત બાળકને પાસેની હોસ્‍પિટલમાં સારવાર માટે લઈ જવામાં આવ્યો હતો, જયાં તેની તબિયત સારી હોવાનું જાણવા મળી રહ્યું છે.

દીકરાને બચાવવા માટે માતાએ દોટ મૂકી:
સૂત્રાપાડાના બરુલા ગામમાં વાડી વિસ્‍તારમાં આવેલ ખેતરમાં મનુભાઇ વાઢેર કામ કરી રહ્યાં હતા. ગઇકાલે સાંજનાં 5 વાગ્‍યાની આસપાસ પત્‍ની મંજુબેન તેના 8 વર્ષીય પુત્ર આર્યનને લઇ ખેતરમાં ચા આપવા માટે ગયા ત્‍યારે ખેતરમાં મંજુબેન જુવારના ક્યારામાં પાણી ભરાયું છે કે નહીં એ જોવા માટે ગયાં હતાં.

આ સમયે ખેતરમાં રમી રહેલ આર્યનને પાછળથી આવેલ દીપડાએ મોઢેથી પકડતાં જ બાળક બુમાબુમ કરતાં માતા મંજુબેને પુત્રને બચાવવા માટે દોટ મુકીને દીપડા પર ત્‍યાં પડેલાં માટી-ધૂળનાં ઢેફાં ફેંક્યાં હતાં, જેને કારણે દીપડો બાળક આર્યનને ત્‍યાં મૂકી ભાગી ગયો હતો.