આમ જનતા માટે રાત્રી કર્ફ્યું અને ભાજપના કાર્યાલય પર મોટી સંખ્યામાં કાર્યકર્તાઓને ભેગા થવા માટે છૂટ?

રાજ્યમાં હાલ સ્થાનિક સ્વરાજની ચૂંટણીનો ગરમાવો જણાય રહ્યો છે. ગુજરાતમાં સ્થાનિક સ્વરાજ્યની ચૂંટણીની તારીખ જાહેર થતાની સાથે જ રાજકીય પાર્ટીઓ સતર્ક થઈ ગઈ છે. ઉમેદવારી નોંધવવા માટે કાર્યાલયો ઉપર ભારે ભીડ જમા થઈ રહી છે. આ ઉપરાંત, કોરોનાના કારણે હાલમાં રાજકોટ,અમદાવાદ, સુરત અને વડોદરામાં રાત્રિ કર્ફ્યૂ (Night curfew)લગાવવામાં આવ્યો છે. પોલીસ રાત્રિ કર્ફ્યૂનો ભંગ કરનાર લોકો સામે કાયદેસરની કાર્યવાહી કરે છે. ત્યારે ગઈ કાલના રોજ રાજકોટ શહેર ભાજપ કાર્યાલય (Rajkot city BJP office) ખાતે રાત્રી કર્ફ્યૂનો ભંગ થયાનું સામે આવ્યું છે.

રાજકોટ શહેર ભાજપ કાર્યાલય ખાતે રાત્રિના 11 વાગ્યા બાદ પણ કાર્યકર્તાઓ તેમજ ઉમેદવારો અને પાર્ટીના સિનિયર નેતાઓ હાજર હોવાનું સામે આવ્યું છે. આ સાથે જ કોરોના મહામારી (Corona pandemic)ના કારણે જે નિયમો બનાવવામાં આવ્યા છે તેનો પણ ખુલેઆમ  ભંગ થતો નજરે પડી રહ્યો છે. ઠેરઠેર સોશિયલ ડિસ્ટન્સિંગ (Social distancing)નો ભંગ તેમજ મોટાભાગના કાર્યકર્તાઓે માસ્ક વગર હોવાનું જોવા મળ્યું હતું.

અત્રે ઉલ્લેખનીય છે કે, શુક્રવારના રોજ 12:39 મિનિટે ભારતીય જનતા પાર્ટીના 72 ઉમેદવાર મહાનગરપાલિકાની ચૂંટણી માટે ઉમેદવારી નોંધાવવાના છે. ઉમેદવારી ફોર્મ ચૂંટણી અધિકારીને સોંપવામાં આવે તે પૂર્વે તેની ખરાઈ કરવા માટે ઉમેદવારો પોતાના સમર્થકો સાથે ભારતીય જનતા પાર્ટીના કાર્યાલય ખાતે પહોંચ્યા હતા. શુક્રવારના રોજ ભારતીય જનતા પાર્ટી દ્વારા બહુમાળી ચોક ખાતે એક સભાનું આયોજન પણ કરવામાં આવ્યું છે.