આવું હશે લોકડાઉન 4- જાણો ગુજરાતમાં કેવી છૂટછાટ મળશે

આજે કેન્‍દ્ર સરકાર લોકડાઉન 4 અંગેની ગાઈડલાઈન્‍સ બહાર પાડવામા આવી રહી છે. દેશના અલગ અલગ રાજ્‍યોએ આપેલી ભલામણ અનુસાર લોકડાઉનના ચોથા તબક્કામાં દેશમાં ઘણા ભાગોમાં આર્થિક પ્રવૃતિઓ ધમધમતી થઈ જશે એ નક્કી છે. લોકડાઉનના અત્‍યાર સુધીના તબક્કા દરમિયાન જે જે ક્ષેત્રોમાં કામકાજ અત્‍યાર સુધી ઠપ્‍પ હતુ તેઓને ચોથા લોકડાઉનમાં રાહત મળી શકે છે.

ઘણા રાજ્યોમાં રેડ ઝોનમાં પણ ધંધા રોજગાર શરૂ કરવા કેન્‍દ્ર સરકારે જણાવ્‍યુ છે. આ દરમિયાન રોટેશન, ઓડઈવન ફોર્મ્‍યુલા, ઓછા માણસો, ઓછો સમય નક્કી કરવાની સાથે કામ, સોશ્‍યલ ડિસ્‍ટન્‍સ અને સ્‍વાસ્‍થ્‍ય પ્રોટોકોલનુ કડકથી પાલન કરવા જેવા નિયમો આવી શકે છે.

મોટાભાગના રાજ્‍યોએ સંપૂર્ણ છૂટની વાત કરી નથી તેથી જે રાહતો મળશે તે શરતો સાથે હશે. સોમવારથી દુકાનો ખુલે તેવી જાહેરાત થાય તેવી સંભાવના છે. જો કે મોલ, શૈક્ષણિક સંસ્‍થાઓ, સિનેમા, ધાર્મિક મંદિર સભાઓ વગેરે ઉપર પ્રતિબંધ ચાલુ રહેશે.

અધિકારીઓનું કહેવુ છે કે આગામી તબક્કામાં ઓરેન્જ ઝોનમાં પણ ઘણી ઓછા પ્રતિબંધો રહેશે. રેડ ઝોનમાં પણ કંનેન્ટમેન્ટ એરિયામાં જ ચુસ્ત પાલન રાખવામાં આવશે. રેડ ઝોનમાં સલૂન, હેર કટિંગની દુકાન અને ચશ્માની દુકાનોને પણ ખોલવાની પરવાનગી મળી શકે છે. જોકે આ સંબંધિત વિસ્તૃત ગાઈડલાઈન રાજ્ય સરકારોના સૂચનોના આધારે ગૃહ મંત્રાલય જારી રાખશે. રાજ્ય સરકારોને શુક્રવાર સુધી પોતાના સૂચનો આપવાનુ કહેવામાં આવ્યુ હતુ.