રાંધણ ગેસના બાટલામાં અપાતી સબસીડી છેલ્લા ત્રણ માસથી આપવામાં આવતી નથી- જાણો…

લોકડાઉનના કારણે વણસેલી સિૃથતિમાં સરકાર મફતમાં ઘઉં, ચોખા અને ચણાનું વિતરણ કરીને લોકોની પડખે હોવાનો દાવો કરે છે, બીજી તરફ છાનેખુણે રાંધણગેસના બાટલામાં અપાતી સબસીડી છેલ્લા ત્રણ માસથી બંધ થઈ ગઈ હોવાની ચોંકાવનારી વિગતો બહાર આવી છે. અત્યાર સુધી ગેસના બાટલામાં સરેરાશ 140થી ર00 રૂપિયા સુધીની સબસીડી મળતી હતી.

પરંતુ ગત મે, જૂન અને જુલાઈ મહિનાની આવી કોઈ સબસીડી ગેસ કનેક્શન ધારકોના ખાતામાં આવી નથી. જેના લીધે ગુજરાત રાજ્યમાં આશરે 93 લાખથી વધારે પરિવારોને સબસીડીની ખોટ સહન કરવાનો વખત આવ્યો છે. સરકાર દ્વારા આ અંગે સત્તાવાર કોઈ ખૂલાસો કરવામાં આવ્યો નથી, જ્યારે ગેસ એજન્સીઓ પાસે પણ લોકોને આપવા માટે યોગ્ય જવાબ નથી.

ત્રણેક મહિના સુધી લાગુ કરાયેલા  લોકડાઉનમાં અનેક લોકોએ રોજગારી ગુમાવી છે. સામાપક્ષે પેટ્રોલ-ડીઝલના ભાવ આસમાને રહ્યા છે. જીવન જરૂરિયાતની વસ્તુઓ એવી કરિયાણાથી માંડીને ખાદ્યતેલ સુધીના ભાવોમાં વધારો થયો છે.

મધ્યમ વર્ગના લોકોને ઘર કેમ ચલાવવું? તે પ્રશ્ન સતાવી રહ્યો છે. તેવી સ્થિતિ વચ્ચે પડયા પર પાટુ સમાન આ બાબતની મળતી વિગતો અનુસાર છેલ્લે ગત એપ્રિલ મહિના સુધી રાંધણગેસના બાટલાની સબસીડી લોકોના બેન્ક ખાતામાં જમા થઈ છે. ત્યાર બાદથી સબસીડી જમા થવાનું બંધ થઈ ગયું છે.