ગુજરાત ભાજપના નેતાઓને લોકડાઉનના નિયમ ન નડે, તેમને કોરોના ન થાય, તેમના માટે દારૂબંધી નથી

ગુજરાતમાં દારૂબંધીનો નિયમ માત્ર આમજનતા માટે બનાવામાં આવ્યો હોય તેવું લાગી રહ્યું છે. ગાંધીના ગુજરાતમાં અવારનવાર દારૂની રેલમછેલ જોવા મળતી હોય છે. તેવો વધુ એક વિડીયો મહીસગમાંથી સામે આવ્યો છે. મહીસાગરમાં સત્તાધારી ભારતીય જનતા પાર્ટીના યુવા સંગઠનના કાર્યકરોનો વીડિયો વાયરલ થયો છે. જેમાં ભાજપના એક સમર્થકના જન્મ દિવસ નિમિત્તે તલવારથી કેક કાપીને જાહેરમાં ઉજવણી કરવામાં આવી હતી. એટલું જ નહિ, જાહેરમાં કેક કાપીને ખુલ્લામાં દારૂ પીવામાં પણ કાર્યકર્તાઓને શરમ આવી ન હતી. આ વીડિયો વીરપુર તાલુકાનો હોવાનું જાણવા મળી રહ્યું છે. આ એક વાયરલ વીડિયોથી સમગ્ર મધ્યગુજરાતમાં હાહાકાર મચી ગયો છે

મહિસાગર જિલ્લાના વીરપુર તાલુકાના આ કથિત વીડિયોમાં યુવા મોરચના કાર્યકર કવન પટેલની બર્થ ડે પાર્ટીમાં દારૂબંધીના લીરેલીરા ઉડાવતો વીડિયો વાઈરલ થયો છે. આટલું જ નહીં આ ઉપરાંત, આ પાર્ટીમાં મહીસાગર જિલ્લાના ગુજરાત રાજ્ય સ્વામીવિવેકાનંદ બોર્ડના જિલ્લા પ્રમુખ યોગેન્દ્ર મહેરા દ્વારા કવન પટેલની બર્થ ડે પાર્ટીનું આયોજન કરવામાં આવ્યું હતું. જેમાં બીયરની છોળો ઉછળી હતી અને કવન પટેલ દ્વારા તલવાર દ્વારા કેક કાપવામાં આવી હતી. આ પાર્ટીમાં ગુજરાત રાજ્ય યુવક બોર્ડના સભ્યો પણ જોડાયા હતા. આ વીડિયો સોશિયલ મીડિયામાં વાઈરલ થયો છે. બર્થ ડે પાર્ટીમાં સોશિયલ ડિસ્ટન્સિંગ અને માસ્કના નિયમોની ઐસી તૈસી કરવામાં આવી હતી.