ચંદ્રયાન-2એ આપી પૃથ્વીની ઉત્પત્તિથી માંડીને વાતાવરણમાં થયેલા ફેરફારો વિશેની માહિતી. જાણો અહીં

હવે માત્ર ભારત જ નહીં પરંતુ દુનિયાના તમામ દેશોની નજર મિશન ચંદ્રયાન-2 પર ટકી છે. કારણ કે ચંદ્રયાન-2નું મુખ્ય કાર્ય ચંદ્રના દક્ષિણ ધ્રુવ પર પાણીની શોધ કરવાનું છે પરંતુ આ ઉપરાંત ચંદ્રના અનેક અજાણ્યા પાસાઓ પણ પ્રકાશમાં આવી શકશે. એટલું જ નહિં અંતરિક્ષયાત્રીઓ માટે લાંબા સમય સુધી ચંદ્ર પર રોકાણ કરવું શક્ય બનશે. ચંદ્રના દક્ષિણ ધ્રુવ પર ચંદ્રયાન-2નું ઉતરાણ થયા બાદ ચંદ્ર વિશેની અનેક અજાણી માહિતીઓ મળી શકે તેમ છે. ચંદ્રયાન-2 દ્વારા અહીં મેગ્નેશિયમ, કેલ્શિયમ અને લોખંડ જેવા ખનીજોને શોધવાનો પ્રયાસ કરવામાં આવશે.

ચંદ્રયાન-2 ચંદ્રના વાતાવરણ અને તેના ઈતિહાસ પર પણ માહિતી એકઠી કરશે પરંતુ તેનું સૌથી મહત્વનું મિશન ત્યાં પાણી હોવાના સંકેતોની શોધ કરવાનું છે. જો ચંદ્રયાન-2 અહીં પાણી હોવાના પુરાવા શોધી શકે છે તો તે અંતરિક્ષ વિજ્ઞાન માટે સૌથી મોટી ઉપલબ્ધિ ગણાશે. કેમકે ત્યાર બાદ અંતરિક્ષમાં નવી શોધોનો રસ્તો ખુલી જશે. ચંદ્ર પર પાણી ન હોવાના કારણે અંતરિક્ષયાત્રી વધુ દિવસો માટે રોકાઈ શકતા નથી પરંતુ બરફથી પીવાના પાણી અને ઓક્સિજનની વ્યવસ્થા કરી શકાશે.

જેના કારણે અંતરિક્ષયાત્રીઓ માટે લાંબા સમય સુધી ચંદ્ર પર રોકાણ કરવું શક્ય બનશે. પાણી અને ઓક્સિજનની વ્યવસ્થા હશે તો ચંદ્ર પર બેઝ કેમ્પ પણ બનાવવામાં આવશે. જ્યાં ચંદ્ર સાથે જોડાયેલા સંશોધનની સાથે અંતરિક્ષ સાથે જોડાયેલા અન્ય મિશનની તૈયારી પણ કરવામાં આવશે. વિવિધ અંતરિક્ષ એજન્સીઓ મંગળ ગ્રહ સુધી પહોંચવા માટે ચંદ્રનો લોન્ચપેડની જેમ ઉપયોગ કરી શકશે. પરિણામે ચંદ્રથી મંગળ ગ્રહ પર પહોંચવા માટે સમય પણ ઓછો લાગશે. આ જ પ્રકારે બાકીના ગ્રહો પર પહોંચવા માટે પણ સરળતા રહેશે.