પોતાના જ પ્રેમી સાથે માતાએ કરાવી દીધા દીકરીના લગ્ન, સુહાગરાતના નામે આચરતો રહ્યો દુષ્કર્મ

માતા અને દીકરીના સબંધોને ચુર ચુર કરતો મામલો સામે આવ્યો છે. એક માતાએ તેની સગીર પુત્રીના લગ્ન તેના જ પ્રેમી સાથે કરાવી દીધા હતા. લગ્ન બાદ પ્રેમીએ સગીરા સાથે બળજબરી પૂર્વક શારીરિક સંબંધો પણ બાંધ્યા હતા. 15 વર્ષની સગીરાએ તેની સાથે થયેલી આ ઘટનાને તેની બહેનપણીને પણ કહી હતી. તેની બહેનપણીએ આ વાત બીજી મહિલાને કીધી. ત્યારે આ મહિલાએ પોલીસમાં ફરિયાદ નોંધાવી હતી. આ પછી આરોપી માતા અને તેના પ્રેમી વિરુદ્ધ બાળ લગ્ન સહિત દુષ્કર્મનો કેસ નોંધવામાં આવ્યો છે.

હકીકતમાં, પુણેના ચંદનનગર વિસ્તારમાં 36 વર્ષની મહિલા તેની 15 વર્ષની સગીર પુત્રી સાથે રહે છે. તેણીને 28 વર્ષીય યુવક સાથે કેટલાક મહિનાઓથી પ્રેમસંબંધ ચાલતો હતો. પ્રેમી મહિલાના ઘરે સતત આવતો જતો હતો. ત્યારબાદ એક દિવસ સગીર દીકરીએ બંનેને વાંધાજનક હાલતમાં જોઈ લીધા.

મહિલાને લાગ્યું કે દીકરી આ વાત બધાને કહી દેશે, એટલે તેણે દીકરીને મારી નાખવાની ધમકી આપીને તેના પ્રેમી સાથે લગ્ન કરવા દબાણ કર્યું. પુત્રીના ના પાડવા છતાં મહિલાએ થોડા દિવસ પહેલા બંનેના લગ્ન કરાવી લીધા હતા. આ પછી આરોપી યુવક સગીર દીકરી સાથે પણ શારીરિક સંબંધ બાંધતો હતો. કેટલાય દિવસો સુધી આમ જ ચાલ્યું. પરંતુ તેની માતાના ડરને કારણે તેણે કોઈને કંઈ કહ્યું નહીં. દરરોજ તેણી પોતાની ઉપર થતી હેવાનિયત સહન કરતી રહી.