અમદાવાદમાં બે ભાઈ વચ્ચે ખેલાયો ખૂની ખેલ: સગા ભાઈને માથામાં ગેસની બોટલ મારીને કરી નિર્મમ હત્યા, જાણો રુંવાડા ઉભા કરી દેતી ઘટના 

અમદાવાદ(ગુજરાત): આજકાલ દિવસેને દિવસે હત્યાના કિસ્સાઓ વધી રહ્યા છે. ત્યારે અમદાવાદના કાગડાપીઠ લૂંટનો ભેદ ઉકેલાયો નથી અને અમરાઈવાડીમાં હત્યા કર્યા બાદ લૂંટ ચલાવનાર આરોપી હજુ પકડાયા પણ નથી ત્યાં શનિવારે વધુ એક હત્યાનો બનાવ બન્યો હતો. ત્યારબાદ રવિવારે મણિનગરમાં ભાઈએ જ ભાઈની હત્યા કરી હોવાનું સામે આવ્યું છે.

જાણવા મળ્યું છે કે, 36 વર્ષીય યુવકની તેના ભાઈએ બોલાચાલી થતા ગેસ રિફિલ માથા અને મોઢાના ભાગે મારી દેતા મોત નીપજ્યું હતું. આરોપીએ 108ને જાણ કરી તેનો ભાઈ પડી ગયો હોવાની કહાની બનાવી હતી. પોલીસને જાણ થતાં પોલીસ દ્વારા તપાસ કરવામાં આવતા જ ગણતરીના સમયમાં હત્યા થઈ હોવાનું બહાર લાવી આરોપીની ધરપકડ કરી છે.

મણીનગર પોલીસ સ્ટેશન વિસ્તારમાં આવેલી દક્ષિણી સોસાયટી પાસેની સરદારની ચાલી ગણપત ગલીમાં રહેતા 36 વર્ષીય સુભાષ મધુકર ગોગવલે અને તેનો ભાઈ નિલેશ માતા સાથે રહે છે. રવિવારે બપોરે બે વાગ્યાના સુમારે સુભાષ ઘરે આવીને તેના નાના ભાઈ નિલેશ મધુકર ગોગવલે સાથે કામધંધો ન કરતો હોવાની બાબતને લઈને ઝઘડો અને માથાકૂટ કરવા લાગ્યો હતો.

બોલાચાલી એટલી હદે વણસી ગઈ કે સુભાષ તેના ભાઈ નિલેશને ગેસનો બાટલો ઉપાડીને મારવા ગયો હતો. આ દરમિયાન, તેના નાનાભાઈ નિલેશ મધુકર ગોગબલે એ તેના મોટાભાઈ સુભાષ મધુકર ગોગવલેના હાથમાંથી ગેસનો બાટલો લઈને તે સુભાષના માથાના ભાગમાં તથા છાતીના ભાગમાં મારી દીધો હતો. જેના કારણે સુભાષ મધુકર ગોગવલેના માથાના ભાગે ગંભીર ઈજા થતા તેનું મૃત્યુ નીપજ્યું હતું.