એકબાજુ મોટાભાઈએ દવાખાનાનું ઉદ્ઘાટન કર્યું અને બીજીબાજુ નાનાભાઈએ ટૂંકાવ્યું જીવન- ખુશી માતમમાં ફેરવાઈ

રાજકોટ(ગુજરાત): તાજેતરમાં વધી રહેલા આપઘાતના બનાવો દરમિયાન ફરીવાર એક આત્મહત્યાનો કિસ્સો સામે આવ્યો છે. જેમાં વિશાલ નામના યુવાને આપઘાત કર્યો છે. જોકે, યુવાન વિશાળ શિવાભાઈ કાકુલદ આપઘાત કરતા પહેલાં પોતાના મોટા ભાઈ યોગેશ દ્વારા શરૂ કરવામાં આવેલા ક્લિનિકના ઓપનિંગમાં પણ હાજર રહ્યો હતો. તેમજ હસતા મોઢે કેક કટિંગ પણ કર્યું હતું.

જાણવા મળ્યું છે કે, રાજકોટ શહેરના માલવિયાનગર પોલીસ સ્ટેશન વિસ્તારમાં વધુ એક આપઘાતનો બનાવ સામે આવ્યો છે. રાજકોટ શહેરના ખોડીયાર નગર વિસ્તારમાં રહેતા વિશાલ નામના યુવકે બપોરના સમયે ગોંડલ રોડ પર આવેલા પી.ડી માલવયા કોલેજની સામે આવેલા રેલવે ટ્રેક પર ટ્રેનની આડે ઝંપલાવી આત્મહત્યા કર્યાનું સામે આવ્યું છે.

આ દરમિયાન, સમગ્ર બનાવની જાણ રેલવે પોલીસ તેમજ માલવિયાનગર પોલીસને થતા તાત્કાલિક અસરથી પોલીસ કાફલો ઘટનાસ્થળે દોડી ગયો હતો. માલવયા નગર પોલીસ દ્વારા યુવકની ઓળખ મેળવી તેના પરિવારજનોને પણ જાણ કરવામાં આવી હતી. આ સમગ્ર મામલે પંચનામાની કાર્યવાહી પૂર્ણ કર્યા બાદ મૃતદેહને પોસ્ટમોર્ટમ માટે મોકલી ગુનો નોંધી કાયદેસરની કાર્યવાહી હાથ ધરવામાં આવી હતી.

પોલીસની પ્રાથમિક તપાસમાં મૃતક યુવકના ભાઈ હોમિયોપેથી ડોક્ટર હોવાનું સામે આવ્યું છે. બુધવારના રોજ સવારના સમયે જ પટેલવાડી વિસ્તારમાં ડોક્ટર અને મૃતક ભાઈએ ક્લિનિકનું ઓપનિંગ કર્યું હતું. જાણવા મળ્યું છે કે, આ સમયે મૃતકના પરિવારજનો સાથે મળીને કેક કટિંગ પણ કર્યું હતું. કેક કટિંગ કર્યા બાદ યુવાન પોતાનું મોટરસાયકલ લઈને નીકળી પડ્યો હતો.