શું તમે પણ આવા ડોક્ટર પાસે સારવાર નથી લીધી ને? માર્કેટમાં ફરી રહ્યા છે નકલી ડોક્ટર- પોલીસે આટલા તબીબોને રંગેહાથ ઝડપી પાડ્યા

હાલમાં ચાલતી કોરોના વૈશ્વિક મહામારીમાં એવા ઘણા કિસ્સા સામે આવ્યા છે જેમાં લોકોના આરોગ્ય સાથે ચેડા કરનાર નકલી ડિગ્રીધારી તબીબોને પકડી પાડવામાં આવ્યા છે. આ દરમિયાન બંગાળી તબીબો પાસે ગુજરાત સરકારના આરોગ્ય વિભાગની કોઈ પરવાનગી નહીં હોવા છતાં નેત્રંગ તાલુકામાં ઘણા ગામડાઓમાં વર્ષોથી અડ્ડો જમાવી બેઠેલા નકલી ડોકટરો આદિવાસી ગરીબ દર્દીઓને સારવારના નામે લૂંટતા હોવાનું સામે આવ્યું છે.

આ દરમિયાન તેમને ઝડપી પાડવા નેત્રંગ પોલીસ દ્વારા કામગીરી હાથ ધરવામાં આવી છે. નેત્રંગ ચાર રસ્તા અને થવા બસ સ્ટેન્ડ નજીક ગેરકાયદેસર દવાખાના ચલાવતા બે નકલી ડોકટરોને દવા અને ઇન્જેક્શન સાથે રંગેહાથ ઝડપી તેમની વિરુધ્ધ કાયદેસર કાર્યવાહી કરવામાં આવી હતી.

જાણવા મળ્યું છે કે, પિયુષ શર્મા નેત્રંગ ચાર રસ્તા પાસે માંડવી રોડ ઉપર અને જવાહર બજારમાં તેના ઘરેથી દવા અને ઈન્જેકશન આપે છે. આ દરમિયાન થવા સ્ટેશન ફળિયામાં ચિત્તરંજન મંડલ આ બન્ને ગેરકાયદેસર રીતે દવાખાનુ ખોલી નકલી સારવાર કરતા હોવાની જાણ થતા નેત્રંગ પોલીસ સ્ટેશનના પીએસઆઈ એન.જી. પાંચાણી દ્વારા બાતમીના આધારે ટીમ બનાવી નેત્રંગ અને થવા સારવાર કરતા બોગસ તબીબો લોકોના આરોગ્ય સાથે ચેડા કરતા રંગેહાથ ઝડપી પાડવામાં આવ્યા હતા.