March 22, 2025
New Zealand PM in India: તારીખ 18-3-2025ના રોજ ન્યુઝીલેન્ડના પ્રધાનમંત્રી ક્રિસ્ટોફર લક્સન તેમના 110 સભ્યોના પ્રતિનિધિમંડળ સાથે દિલ્હીના સ્વામિનારાયણ અક્ષરધામની (New Zealand PM in India) મુલાકાતે આવ્યા હતા, આ પ્રતિનિધિમંડળમાં ન્યુઝીલેન્ડના અનેક ઉચ્ચ કક્ષાના અધિકારીઓ, મંત્રીઓ, નેતાઓ અને સમુદાયના પ્રતિનિધિઓનો સમાવેશ થતો હતો. પ્રધાનમંત્રી લક્સન અને તેમના પ્રતિનિધિમંડળનું અક્ષરધામમાં પારંપરિક સ્વાગત કરવામાં આવ્યું હતું, ત્યારબાદ અક્ષરધામની આધ્યાત્મિકતા અને સાંસ્કૃતિક ભવ્યતા નિહાળી તેઓ અભિભૂત થયા હતા. પ્રધાનમંત્રી લક્સને સ્વામિનારાયણ અક્ષરધામ મંદિરમાં પુષ્પાંજલિ અર્પણ કરી સૌની શાંતિ, સદ્ભાવના અને સુખાકારી માટે નીલકંઠ વર્ણી અભિષેક દ્વારા પ્રાર્થના પણ વ્યક્ત કરી હતી.
પ્રધાનમંત્રીની સાથે આ મુલાકાતમાં વેપાર મંત્રી ટોડ મેકલે, વંશીય સમુદાય મંત્રી માર્ક મિશેલ અને પ્રવાસન મંત્રી લુઇસ અપસ્ટન પણ સામેલ થયા હતા. ઉપરાંત, સંસદીય સભ્યો એન્ડી ફોસ્ટર, કાર્લોસ ચિયુંગ, ડૉ. પરમજીત પરમાર, પ્રિયંકા રાધાકૃષ્ણન તેમજ ન્યુઝીલેન્ડના હાઈ કમિશનર એચ.ઈ. પેટ્રિક રાટા પણ હાજર રહ્યા હતા. વ્યાપારી પ્રતિનિધિમંડળમાં ન્યુઝીલેન્ડની મુખ્ય કંપનીઓના ટોચના અધિકારીઓનો સમાવેશ થતો હતો.
પ્રધાનમંત્રીને માઓરી ભાષામાં અનુવાદિત ‘સત્સંગ દીક્ષા’ ગ્રંથની પ્રથમ નકલ અર્પણ કરવામાં આવી
પ્રધાનમંત્રી લક્સનને મહંત સ્વામી મહારાજ દ્વારા લખાયેલ ‘સત્સંગ દીક્ષા’ ગ્રંથની માઓરી ભાષામાં અનુવાદિત પ્રારંભિક નકલ ભેટમાં આપવામાં આવી હતી. યુગોથી વહેતી વૈદિક સનાતન હિન્દુ ધર્મની આધ્યાત્મિક પરંપરાને વિસ્તારીને, આચાર, વિચાર, વ્યવહાર અને આધ્યાત્મિક સાધનાના માર્ગદર્શનને સમાવતો મૂળ ગુજરાતીમાં રચાયેલ સત્સંગ દીક્ષા ગ્રંથ, સ્વામિનારાયણ પરંપરાનો એક મૌલિક ગ્રંથ છે, જે સૌને આંતરિક શાંતિ, નિઃસ્વાર્થ સેવા અને આધ્યાત્મિક શિસ્તને અનુસરવા માટે પ્રેરણા આપે છે. માઓરી ભાષામાં તેનું ભાષાંતર બંને દેશો વચ્ચે ઊંડા સાંસ્કૃતિક અને આધ્યાત્મિક સંબંધોને પ્રોત્સાહન આપવા માટે એક મહત્વપૂર્ણ પગલું છે.
મહંત સ્વામી મહારાજનો સંદેશ
મહંત સ્વામી મહારાજે પ્રધાનમંત્રી લક્સનને પાઠવેલા શુભેચ્છા સંદેશમાં જણાવ્યું,
“અક્ષરધામમાં તમારી ઉપસ્થિતિ અને આ મુલાકાતમાં વિતાવેલો સમય સાંસ્કૃતિક અને આધ્યાત્મિક મૂલ્યો પ્રત્યેના તમારા આદરને પ્રતિબિંબિત કરે છે. અક્ષરધામ શ્રદ્ધા, એકતા અને સમાજની સેવાનો આધારસ્તંભ છે, અને તમારી મુલાકાતે સદ્ભાવના અને સંવાદિતાના સંદેશને વધુ મજબૂત બનાવ્યો છે.”
Trending News
મહંત સ્વામી મહારાજે ન્યુઝીલેન્ડમાં ભારતીય સમુદાયને આપેલા સમર્થન બદલ પ્રધાનમંત્રીનો આભાર માન્યો હતો. આ ઉપરાંત, વડા પ્રધાન લક્સનના નેતૃત્વ, તેમના પરિવારની સુખાકારી અને ન્યુઝીલેન્ડની શાંતિ અને સમૃદ્ધિ માટે ખાસ પ્રાર્થના કરવામાં આવી હતી.
પ્રધાનમંત્રીએ વ્યક્ત કરેલાં અનુભવો
અક્ષરધામની આ મુલાકાતના પોતાના અનુભવ પર પ્રતિબિંબ પાડતા, પ્રધાનમંત્રી લક્સને જણાવ્યું, “અક્ષરધામમાં આવવું ખૂબ જ ખાસ છે. આ ભવ્ય મંદિરની મુલાકાત લેવી અને અહીં થયેલા અદ્ભુત કાર્યને જોવું ખરેખર પ્રેરણાદાયક છે. અમારા વ્યાવસાયિક અને સમુદાયના પ્રતિનિધિમંડળને અહીં લાવવું એ ખૂબ જ સન્માનની વાત છે. હું ન્યુઝીલેન્ડમાં બી.એ.પી.એસ સમુદાયનો આભાર માનું છું. મેં 2023 માં ઓકલેન્ડની મુલાકાત લીધી હતી, અને ન્યુઝીલેન્ડમાં શ્રદ્ધાની અભિવૃદ્ધિ અને વેલિંગ્ટનમાં નવા મંદિરની શરૂઆત જોવી અદ્ભુત છે. આ ખૂબ જ ખાસ બાબત છે.”
તેઓ સ્વામિનારાયણ અક્ષરધામના શાંતિપૂર્ણ વાતાવરણ અને આધ્યાત્મિક ઊંડાણથી પ્રભાવિત થયા હતા અને વિઝિટર ડાયરીમાં લખ્યું હતું: “સુંદર અને પ્રેરણાદાયક અક્ષરધામ મંદિરમાં શ્રદ્ધાંજલિ આપવી એ મારા માટે એક મોટો લહાવો રહ્યો છે.”
સોશિયલ મીડિયા પર તેમણે ભારતીય સમુદાય માટે મંદિરના મહત્વનો પણ સ્વીકાર કર્યો:
“ન્યુઝીલેન્ડમાં હિન્દુ સમુદાયે આપણા દેશ માટે મોટું યોગદાન આપ્યું છે. આજે દિલ્હીમાં મેં બી.એ.પી.એસ સ્વામિનારાયણ અક્ષરધામ મંદિરમાં શ્રદ્ધાંજલિ આપી, જે ઘણા કિવી-ભારતીયો માટે પવિત્ર સ્થળ છે.”
પ્રધાનમંત્રી લક્સને ન્યુઝીલેન્ડમાં ભારતીય સમુદાયના યોગદાનનો સ્વીકાર કરતા કહ્યું: “અમે તમારી ખૂબ પ્રશંસા કરીએ છીએ. ન્યુઝીલેન્ડમાં સંસ્કૃતિ, સમાજ અને અર્થતંત્ર – એમ ઘણા સ્તરો પર તમારું યોગદાન દેશને સમૃદ્ધ બનાવી રહ્યું છે. તમે ન્યુઝીલેન્ડને એક વધુ સારું અને વધુ સમૃદ્ધ સ્થાન બનાવ્યું છે.”
- ગુગલ ન્યુઝમાં Trishul News Gujarati ની અપડેટ મેળવવા ક્લિક કરો: Trishul News Gujarati
- નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે.
- વોટ્સેપ પર સમાચાર મેળવવા અહીં ક્લિક કરીને Hi લખી મેસેજ કરો.
- યુટ્યુબ ચેનલ સબસ્ક્રાઈબ કરીને જોતા રહો વિડીયો ન્યુઝ: Trishul News YouTube
- એન્ડ્રોઇડ એપ ડાઉનલોડ કરો: Trishul News Gujarati Android App આઈફોન માટે એપ ડાઉનલોડ કરો: Trishul News Gujarati iPhone App