સુરતના હીરાબાગ ખાતે બસમાં બ્લાસ્ટ થતા એક મુસાફર બળીને ખાક – મદદ માટે તડપતા રહ્યા લોકો

સુરત(Surat): હીરાબાગ(Hirabag) નજીક મંગળવારે એટલે કે ગઈકાલે મોડી રાત્રે લકઝરી બસ(Luxury bus)માં અચાનક જ આગ(Fire bus) લાગતાં જ એસીનું કોમ્પ્રેસર ધડાકાભેર ફાટતા ગણતરીની સેકન્ડોમાં જ આગ વધુ વિકરાળ બની હતી. બસમાં જમણી બાજુ ડબલ સીટ કેબિનમાં બેઠેલા યુગલમાંથી યુવક તો પોતાનો જીવ બચાવવા માટે બહાર નીકળી ગયો હતો, પરંતુ મહિલા અંદર જ ફસાઈ જતાં તે આગમાં જીવતી સળગી ગઈ હતી.

મળતી માહિતી અનુસાર, ભાવનગર જવા નીકળેલી લકઝરી બસમાં ‘લકઝરી’ સેવાને કારણે જ બસમાં શોર્ટસર્કિટ થયું હોવાનું પ્રાથમિક તપાસમાં સામે આવ્યું છે. આગ લાગ્યા પછી તરત જ બસના પાછળના ભાગે જોરદાર બ્લાસ્ટ થયો હતો. બસમાં 1×2ની વ્યવસ્થાની સ્લિપિંગ ACની વ્યવસ્થા કરવામાં આવી હતી. જમણી તરફ પાછળના ભાગે બે રેકમાં ડબલ બેડવાળા બોક્સ હતા અને તેમાં ઉપરના ભાગે મહિલા સહિત બે લોકો ઉપસ્થિત હતા. એકાએક આગ લાગવાને કારણે આ બોક્સમાં બેઠેલી મહિલાને બસમાંથી ઊતરવાનો થોડો પણ સમય ન મળ્યો અને તે જોતજોતાંમાં બસની અંદર જ જીવતી સળગી ગઈ હતી.

જાણવા મળ્યું છે કે, બસમાં મોબાઇલ ચાર્જિંગ માટેના પણ યુનિટ્સ ન આપવામાં આવેલ હતા. જાણવા મળી રહ્યું છે કે તેને કારણે પહેલા શોર્ટસર્કિટ થયું અને ત્યારબાદ અચાનક જ આગ ભભકી ઉઠી હતી. આગ લાગ્યા પછી બસના નીચેના ભાગમાં તાપમાન વધી ગયું હતું અને તરત જ એસીનું કમ્પ્રેસર ફાટતા જોરદાર ધડાકો થયો હતો. આ બ્લાસ્ટ અને બસમાં સૂવા માટે ગોઠવાયેલી ફોમની ગાદીને કારણે આગે વિકરાળ સ્વરૂપ ધારણ કર્યું હતું.