ભાજપના ધારાસભ્ય અને નેતાઓએ પાણીની ટાંકી પર ચઢી કલાકો સુધી કર્યો હાઈ વોલ્ટેજ ડ્રામા- જાણો શું છે મામલો?

રાજસ્થાન(Rajasthan)ના બુંદી(Bundi)માં ભાજપ(BJP)ની મહિલા ધારાસભ્યએ પાર્ટીના પદાધિકારીઓ અને કાર્યકરો સાથે ટાંકી પર ચઢીને વિરોધ(Protest) કર્યો હતો. ભાજપના ધારાસભ્ય ચંદ્રકાન્તા મેઘવાલ વિસ્તારમાં ચોરી, લૂંટ અને કાયદો અને વ્યવસ્થાના મુદ્દાને લઈને પોલીસ સામે વિરોધ કરી રહ્યા હતા.

મામલો બુંદી જિલ્લાના કપરેનનો છે. ભાજપના ધારાસભ્ય ચંદ્રકાન્તા મેઘવાલ, ભાજપ જિલ્લા અધ્યક્ષ ચિતારલાલ રાણા સહિત ભાજપના નેતાઓ અને કાર્યકરોએ ટાંકી પર ચડીને પોલીસ પ્રશાસન સામે 10 કલાક સુધી વિરોધ પ્રદર્શન કર્યું હતું. ભાજપના નેતાઓએ આક્ષેપ કર્યો હતો કે આ વિસ્તારમાં દરરોજ ચોરી અને લૂંટની ઘટનાઓ બની રહી છે. પરંતુ પોલીસ તેમને રોકવામાં નિષ્ફળ રહી છે.

ભાજપના ધારાસભ્ય ચંદ્રકાન્તા મેઘવાલે કહ્યું કે છેલ્લા 15 દિવસમાં કપરેનમાં ચોરી અને લૂંટની 15 ઘટનાઓ સામે આવી છે. તેમાંથી 25-30 લાખ રૂપિયાની લૂંટ થઈ છે. પરંતુ પોલીસ એક પણ ઘટનામાં આરોપીઓને પકડવામાં નિષ્ફળ રહી છે. આ મામલામાં ભાજપના ધારાસભ્યએ તેમના સમર્થકો સાથે જિલ્લા વહીવટીતંત્રને કાર્યવાહી કરવા માટે 7 દિવસનું અલ્ટીમેટમ આપ્યું હતું. પરંતુ પોલીસ પ્રશાસનને સફળતા ન મળતા ભાજપના ધારાસભ્યએ આ અનોખી રીતે વિરોધ કરવાનું નક્કી કર્યું.