‘ઝડપની મજા બની મોતની સજા’ – દેશમાં અકસ્માતને કારણે 2020માં એટલા મોત થયા કે, આંકડો જાણી ચોંકી ઉઠશો

ગયા વર્ષે ભારત(India)માં ઝડપને કારણે માર્ગ અકસ્માત(Road accident)માં 75,333 લોકોના મોત થયા હતા. જ્યારે બે લાખ નવ હજાર 736 માર્ગ મુસાફરો ઘાયલ થયા છે. તાજેતરના સરકારી ડેટા અનુસાર, 3,54,796 માર્ગ અકસ્માતોમાંથી 2,15,159 વાહનોની વધુ ઝડપને કારણે થયા હતા, જે માર્ગ અકસ્માતોમાં 60 ટકા હિસ્સો ધરાવે છે. નેશનલ ક્રાઈમ રેકોર્ડ બ્યુરો (NCRB)ના વાર્ષિક અહેવાલ મુજબ, 2019ની સરખામણીમાં 2020માં માર્ગ અકસ્માતમાં મૃતકોની સંખ્યા 0.52 થી ઘટીને 0.45 (હજાર વાહન દીઠ) થઈ ગઈ છે. માર્ગ અકસ્માતમાં ઘટાડો થયો છે. 2019માં 467171 માર્ગ અકસ્માતો થયા હતા જ્યારે 2020માં આ સંખ્યા ઘટીને 368828 થઈ ગઈ હતી. 2020માં માર્ગ અકસ્માતમાં 146354 લોકોના મોત થયા હતા અને 336248 લોકો ઘાયલ થયા હતા.

યુપીમાં પ્રથમ વખત માર્ગ અકસ્માતમાં ઘટાડો:
ઉત્તર પ્રદેશમાં પ્રથમ વખત માર્ગ અકસ્માતોની સંખ્યામાં ઘટાડો થયો છે. 2020માં રાજ્યમાં 30590 માર્ગ અકસ્માતો થયા હતા જ્યારે 2019માં આ સંખ્યા 42368 હતી. માર્ગ અકસ્માતોમાં ઘટાડાના સંદર્ભમાં, તમિલનાડુ પ્રથમ ક્રમે છે, ત્યાં 2019માં 59499 અકસ્માતો થયા હતા અને 2020માં ઘટીને 46443 થઈ ગયા છે. બીજા સ્થાને કેરળ છે, જ્યાં માર્ગ અકસ્માતોની સંખ્યા 40354 થી ઘટીને 27998 થઈ ગઈ છે. NCRBના રિપોર્ટ અનુસાર, 2020માં સૌથી વધુ માર્ગ અકસ્માતો વાહનોની વધુ ઝડપને કારણે થયા હતા. આ સિવાય બેદરકારી કે ઓવરટેકને કારણે 86248 માર્ગ અકસ્માતો થયા છે. જેમાં 35219 લોકોના મોત થયા હતા અને 77067 લોકો ઘાયલ થયા હતા.

જેમાં મોટાભાગના ટુ વ્હીલર સવારોના મોત થયા હતા:
2020 માં થયેલા કુલ માર્ગ અકસ્માતોમાંથી 58,120 (43 ટકા) મૃત્યુ દ્વિચક્રી વાહનોને કારણે થયા હતા. તે જ સમયે, કાર અકસ્માતોમાં 17538 લોકો (13 ટકા) અને ટ્રક અકસ્માતોમાં 16993 લોકો (12.8 ટકા) માર્યા ગયા હતા. આમાં મહારાષ્ટ્રમાં 5877 (10 ટકા) લોકો ટુ વ્હીલર અને યુપીમાં 5735 (9 ટકા) લોકોના મોત થયા છે. કાર અકસ્માતોમાં યુપી મોખરે છે, કુલ 17,538 કાર અકસ્માતોમાંથી 3190 (18%) મૃત્યુ સાથે.

પ્રથમ વખત મૃત્યુઆંક ઘાયલોને વટાવી ગયો છે:
રિપોર્ટમાં ચોંકાવનારો ઘટસ્ફોટ એ છે કે દર વર્ષે માર્ગ અકસ્માતમાં ઘાયલોની સંખ્યા વધુ છે અને મૃતકોની સંખ્યા ઓછી છે. પરંતુ આ પ્રથમ ઘટના છે જ્યારે ત્રણ રાજ્યોમાં માર્ગ અકસ્માતમાં મૃત્યુઆંક ઘાયલોની સંખ્યા કરતાં વધી ગયો છે. મિઝોરમમાં 47 માર્ગ અકસ્માતોમાં 53 લોકોના મોત થયા છે અને 45 લોકો ઘાયલ થયા છે. પંજાબમાં 5173 અકસ્માતોમાં 3916 લોકોના મોત અને 2881 લોકો ઘાયલ થયા છે. તે જ સમયે, યુપીમાં 28653 અકસ્માતોમાં 19037 લોકોના મોત થયા હતા જ્યારે 15982 લોકો ઘાયલ થયા હતા.