હવે સુપ્રીમ કોર્ટે પણ કેન્દ્રની બોચી પકડી કહ્યું દેશમાં કટોકટીનો માહોલ, અને નોટીસ આપીને માંગ્યા ચાર જવાબ

નવી દિલ્હી: સુપ્રીમ કોર્ટે ગુરુવારે દેશમાં કોરોનાની સ્થિતિ પર ચિંતા વ્યક્ત કરી છે. સર્વોચ્ચ અદાલતના મુખ્ય ન્યાયાધીશે કહ્યું કે દેશમાં કોવિડને કારણે સ્થિતિ રાષ્ટ્રીય કટોકટી જેવી બની ગઈ છે. સુપ્રીમ કોર્ટે દેશમાં કોરોના વિશે બગડતી સ્થિતિને લઈને સુઓ મોટો કરી છે. ઓક્સિજનનો પુરવઠો અને રસીના મુદ્દા સહિત ચાર મુદ્દાઓ પર કોર્ટે સ્વતઃ અવલોકન કર્યું છે. સીજેઆઈ એસએ બોબડેએ આ અંગે કેન્દ્રને નોટિસ ફટકારી છે.

સીજેઆઈએ કહ્યું હતું કે ‘આપત્તિને પહોંચી વળવા રાષ્ટ્રીય યોજના જોઈએ છે.’ સુપ્રીમ કોર્ટે કહ્યું, ‘6 હાઈકોર્ટો આ મુદ્દાઓની સુનાવણી કરી રહી છે. અમે જોશું કે કયા મુદ્દાઓને અમારી પાસે રાખીએ કે નહીં. કોર્ટે કહ્યું કે રાજ્યોને લોકડાઉન લાદવાનો અધિકાર હોવો જોઈએ.

સુપ્રીમ કોર્ટે કહ્યું છે કે તે ઓક્સિજનની સપ્લાય, આવશ્યક દવાઓનો પુરવઠો, રસી લાગુ કરવાની પદ્ધતિ અને પ્રક્રિયા અને લોકડાઉન મુદ્દે વિચારણા કરશે. આમ સુપ્રીમે ચાર મુદ્દાઓ પર નોટિસ ફટકારી છે જેમાં, ઓક્સિજનનો પુરવઠો, આવશ્યક દવાઓનો પુરવઠો, રસીકરણની પદ્ધતિ અને રીત અને લોકડાઉન જાહેર કરવાનો પાવર વગેરે બાબતનો સમાવેશ થાય છે.

સુપ્રીમ કોર્ટે આ મુદ્દે જુદા જુદા રાજ્યોમાં ચાલી રહેલી સુનાવણી અંગે કહ્યું હતું કે ‘દિલ્હી, મધ્યપ્રદેશ, બોમ્બે, કલકત્તા, સિક્કિમ અને અલ્હાબાદ હાઈકોર્ટ કેસની સુનાવણી કરી રહ્યા છે, જોકે તેઓ સારા હિત માટે સુનાવણી કરી રહ્યા છે, પરંતુ આ મૂંઝવણ પેદા કરી રહ્યું છે અને સંસાધનો બદલી નાખવામાં આવે છે.