ઓસ્ટ્રેલિયા વર્લ્ડકપ રમવા ગયેલા આ દિગ્ગજ દેખાડી વિરુદ્ધ નોંધાઈ દુષ્કર્મની ફરિયાદ, પોલીસે કરી ધરપકડ

Danushka Gunathilaka: સિડની પોલીસે શ્રીલંકાના ઓપનર દાનુષ્કા ગુનાથિલાકાની ધરપકડ કરી છે. તેમની સામે દુષ્કર્મના આરોપ બાદ આ ધરપકડ કરવામાં આવી છે. હાલમાં તે સિડનીમાં છે, જ્યારે શ્રીલંકાની બાકીની ટીમ ટી20 વર્લ્ડ કપ 2022માંથી બહાર થઈને કોલંબો જવા રવાના થઈ ગઈ છે.

દાનુષ્કા પર 29 વર્ષની એક મહિલાએ યૌન શોષણનો આરોપ લગાવ્યો છે. મહિલાનું કહેવું છે કે દાનુષ્કાએ તેના ઘરે તેનું યૌન શોષણ કર્યું છે. આ ઘટના આ અઠવાડિયાની શરૂઆતમાં બની હોવાનું કહેવાય છે.

ન્યૂ સાઉથ વેલ્સ પોલીસે એક નિવેદન જારી કરીને કહ્યું છે કે, ‘બંને એક ઓનલાઈન ડેટિંગ એપ દ્વારા ઘણા દિવસોની વાતચીત પછી મળ્યા હતા. આરોપ છે કે 2 નવેમ્બર 2022ની સાંજે દાનુષ્કાએ મહિલાનું યૌન શોષણ કર્યું હતું. આ પછી, પોલીસે આગલા દિવસે મહિલાના રહેઠાણ ‘રોઝ બે’ ખાતે ક્રાઇમ સીનની તપાસ હાથ ધરી હતી. તપાસ બાદ 31 વર્ષીય દાનુષ્કાની સિડનીની સસેક્સ સ્ટ્રીટ પરની એક હોટલમાંથી ધરપકડ કરવામાં આવી હતી. નિવેદનમાં એમ પણ કહેવામાં આવ્યું છે કે ગુણાથિલકાને ટીમ હોટલથી સીધા સિડની પોલીસ સ્ટેશન લઈ જવામાં આવ્યો હતો, જ્યાં તેમની સંમતિ વિના શરીર સુખ માણવા બદલ તેની સામે કેસ નોંધવામાં આવ્યો હતો.

ગુણાથિલકા ઈજાના કારણે બહાર થયો હતો
દાનુષ્કા ગુનાથિલાકા T20 વર્લ્ડ કપ 2022માં શ્રીલંકાની ટીમનો ભાગ હતો. જોકે અહીં તે માત્ર એક જ મેચ રમી શક્યો હતો. તે નામિબિયા સામે પ્રથમ રાઉન્ડની પ્રથમ મેચમાં ઉતર્યો હતો. આ મેચમાં તે ખાતું ખોલાવ્યા વગર જ પેવેલિયન પરત ફર્યો હતો. આ પછી તે ઈજાગ્રસ્ત થયો હતો અને સમગ્ર ટૂર્નામેન્ટમાંથી બહાર થઈ ગયો હતો. તેના સ્થાને આશિન બંદરાને ટીમમાં સામેલ કરવામાં આવ્યો હતો. જોકે, તેની બદલી કરવામાં આવી હોવા છતાં ગુણાથિલાકા ઓસ્ટ્રેલિયામાં જ ટીમ સાથે સંકળાયેલા હતા.