મહારાષ્ટ્રમાં જે રાજકારણ થયું તેની ભવિષ્યવાણી પહેલેથી જ કરી હતી આ નેતાએ, જાણો વિગતે

મહારાષ્ટ્રમાં ભજવાય રહેલા ડ્રામા અંગે એનડીએના સાથી પક્ષ RPIના અધ્યક્ષ રામદાસ અઠાવલેએ પ્રતિક્રિયા આપતાં કહ્યું કે, આ વાત પહેલેથી જ નક્કી હતી કે, અમારી પાર્ટી, ભાજપ અને એનસીપીની જ સરકાર બનવી જોઈતી હતી. દરેક લોકોને વિશ્વાસ હતો કે, એનસીપી ભાજપની સાથે જ જશે. ભાજપે શિવસેનાને લટકાવી દીધું છે, કોંગ્રેસને ફટકો આપ્યો છે અને એનસીપીને અટકાવી દીધું છે. અઠાવલેએ વધુમાં કહ્યું કે, અમિત શાહ કહેતા હતા કે, બધું યોગ્ય થઈ જશે અને તે થઈ ગયું. ભાજપે શિવસેનાને પાઠ ભણાવ્યો છે. સાથે જ અઠાવલેએ સંકત આપ્યાં કે, કેન્દ્રમાં એનસીપીને મંત્રી પદ મળી શકે છે. સુપ્રિયો સુલે કેન્દ્રમાં મંત્રી બની શકે છે.

તો એનસીપીના અધ્યક્ષ શરદ પવારે મહારાષ્ટ્રમાં ભાજપ-એનસીપીની સરકાર અંગે નિવેદન આપતાં કહ્યું કે, મહારાષ્ટ્રમાં જે કોઈ ઉલટફેર થયો છે તે મારી જાણકારી બહાર થયો છે. શરદ પવારે કહ્યું કે, ભાજપને સમર્થન આપવાનો આ નિર્ણય પાર્ટીનો નથી, એનસીપીની જાણ બહાર આ નિર્ણય લેવાયો છે. સાથે જ શરદ પવારે કહ્યું કે, અજિત પવારે પાર્ટી તોડી દીધી છે. તો પ્રફુલ પટેલે પણ અજીત પવારના નિર્ણયને સમર્થન નહીં આપવાનું કહી, શરદ પવારનો મહારાષ્ટ્રમાં ગઠીત સરકાર સાથે કોઈ લેવડ દેવડ નથી તેમ જણાવ્યું.  જો કે કોંગ્રેસે કહ્યું છે કે, શરદ પવારની જાણ બહાર આ ગઠબંધન થયું હોય તે વાત શક્ય જ નથી.