ચોટીલા માનતા પુરી કરવા જતા પરિવારને નડ્યો અકસ્માત- 1 વર્ષની દીકરી અને કાકાનું ઘટનાસ્થળે જ મોત

આજકાલ અકસ્માતના કિસ્સા સતત સામે આવી રહ્યા છે આ દરમિયાન રાજકોટ-અમદાવાદ હાઇવે પર વધુ એક હિટ એન્ડ રનની ઘટના સામે આવી છે. જેમાં દીકરીની માનતા પુરી કરવા જતાં રાજકોટના મિયાત્રા પરિવારને કાળ ભેટ્યો હતો. જેમાં પગપાળા ચાલીને જતા પરિવારને પાછળથી અજાણ્યા વાહને ઠોકર મારતા જે દીકરીને માનતા હતી તે 1 વર્ષની માસૂમ દીકરી અને તેના કાકાનું ઘટના સ્થળે જ કરુણ મોત નીપજ્યું હતું. આ ઘટના બાદ પરિવારમાં શોકનો માહોલ છવાયો હતો.

મળી માહિતી મુજબ, રાજકોટના આજીડેમ સર્કલ નજીક રહેતા મિયાત્રા પરિવારને ગંભીર અકસ્માત નડ્યો હતો. ગઇકાલે સાંજના સમયે વરસાદે વિરામ લીધા બાદ મિયાત્રા પરિવારના 4 સભ્યો 6 વાગ્યા આસપાસ પગપાળા ચાલીને 1 વર્ષની દીકરીની માનતા પુરી કરવા માટે ઘરેથી નીકળ્યો હતો. આ દરમિયાન રાત્રિના લગભગ 1 થી 1:30 વાગ્યાના અરસામાં રાજકોટ-અમદાવાદ હાઇવે પર કુચીયાદળ ગામ નજીક અજાણ્યા વાહનચાલકે પાછળથી પૂરપાટ ઝડપે આવી ઠોકર મારી ત્યાંથી ફરાર થઇ ગયો હતો.

જેમાં 1 વર્ષની માસૂમ દીકરી નવ્યા અને તેના કાકા રવિભાઇ મિયાત્રાનું સ્થળ પર જ મોત નીપજ્યું હતું. આ ઉપરાંત તેના માતા-પિતાને ઇજા પહોંચતા સારવાર માટે રાજકોટ સિવિલ હોસ્પિટલ ખસેડવામાં આવ્યા હોવાનું જાણવા મળ્યું છે. નવ્યાના પિતાએ જણાવ્યું હતું કે, મારે સંતાનમાં એક જ દીકરી હતી અને એ જ દીકરીની માનતા પુરી કરવા માટે તેઓ ગઇકાલે સાંજે 6 વાગ્યે પગપાળા ચાલીને ચોટીલા માનતા પુરી કરવા જઇ રહ્યા હતા.