આખો દિવસ કામ કરીને પતી ઘરે આવ્યો ત્યાં આખું ઘર લોહીલુહાણ અને મળી પત્ની-દીકરાની લાશ- હ્રદય કંપાવનારી છે ઘટના

બનાસકાંઠા(ગુજરાત): આજકાલ વધી રહેલી હત્યાના કિસ્સા દરમિયાન ફરીવાર એક ચકચાર મચાવતો હત્યાનો કિસ્સો સામે આવ્યો છે. જેમાં બનાસકાંઠાના સરહદી વિસ્તાર મેઢાલા ગામની સીમમાં માતા-પુત્રની અજાણ્યા શખ્સો દ્વારા તિક્ષણ હથિયાર વડે ધા મારી હત્યા કરી હોવાની ચકચારી ઘટના સામે આવી છે. ઘટનાને પગલે થરાદ પોલીસ મામલતદારની ટીમ ઘટનાસ્થળે પહોંચી હતી. થરાદ પોલીસ દ્વારા બંને મૃતકોની લાશને પોસ્ટમોર્ટમ માટે ખસેડી અજાણ્યા હત્યારાઓની શોધવાની કવાયત હાથ ધરવામાં આવી છે.

જાણવા મળ્યું છે કે, બનાસકાંઠા જિલ્લામાં છેલ્લા ઘણા સમયથી ક્રાઈમની ઘટનાઓમાં વધારો થયો છે જેમાં ગઈકાલે મોડી રાતે થરાદ તાલુકાના મેઢાળા ગામે કોઈ અજાણ્યા શખ્સો દ્વારા તિક્ષણ હથિયાર વડે માતા અને પુત્રની હત્યા કરવામાં આવી હોવાની ઘટના સામે આવી છે. મળતી મહિતી મુજબ, થરાદના મેઢાળા ગામે રહેતા ઇસરા પટેલ ખેત મજૂરી કરી પોતાના પરિવારનું ગુજરાન ચલાવે છે.

જાણવા મળ્યું છે કે, તેઓ ગઈ કાલે મજૂરી કામ માટે બહાર ગયા હતા. આ દરમિયાન, તેમની પત્ની સીતાબેન ઘરે હતા. તેમજ 13 વર્ષીય પુત્ર પરેશ ભણવા ગયો હતો. આ દરમિયાન, મોડી સાંજે તેઓ ઘરે પરત આવતાં જ તેમની પત્ની અને પુત્રની લાશ જોતા જ તેમના પગ તળેથી જમીન સરકી ગઈ હતી.

સીતાબેન અને પરેશના માથાના ભાગે કોઈ અજાણ્યા શખ્સો દ્વારા તિક્ષણ હથિયારના ઘા મારી હત્યા કરી ફરાર થઈ ગયા હોવાનું સામે આવ્યું છે. જાણવા મળ્યું છે કે, ઘટનાની જાણ થતાં આજુબાજુના લોકો અને સીતાબેનના પિયારીયાઓ પણ ત્યાં આવી પહોંચ્યા હતા. હત્યા અંગે જાણ કરતા થરાદ પોલીસ અને મામલતદારની ટીમ પણ ઘટના સ્થળે આવી પહોંચી હતી.