ST ડ્રાઇવરની બેદરકારીએ લીધો માસુમનો જીવ- 108 વાળાએ લઈ જવાની ના પાડતા બસ નીચે જ તડપી તડપીને મોત

સુરત(SURAT): આજકાલ અવારનવાર માર્ગ અકસ્માતના કિસ્સાઓ(Accident) બની રહ્યા છે ત્યારે ફરી એકવાર આવો જ એક માર્ગ અકસ્માતનો કિસ્સો સામે આવ્યો છે. મળતી માહિતી અનુસાર, આ કિસ્સો બારડોલીમાં સર્જાયો હતો. કહેવામાં આવી રહ્યું છે કે, રેલ્વે બસ સ્ટેન્ડ પર બસના ચાલકની ભૂલના કારણે મુસાફરનો પગ ટાયર નીચે આવી જતા કચડાઇ ગયો હતો.

ઘટના સ્થળે હાજર લોકોએ ઇજાગ્રસ્તને સારવાર માટે 108 બોલાવી હતી. પરંતુ 180ના કર્મચારીએ કહ્યું ,’ દર્દી એકલો હોય, અને તેની પાસે પૈસા પણ ન હોવાથી હોસ્પિટલવાળા પહેલા પૈસા માંગે’ તેમ કહીને દર્દીને લઈ જવાની ના પાડી દીધી હતી. ઇજાગ્રસ્ત મુસાફર દર્દથી સ્થળ પર અડધો કલાક તડપતો રહ્યો. અને 45 મિનીટ બાદ પોલીસ ઘટના સ્થળે આવ્યા બાદ સરદાર હોસ્પિટલમાં(Sardar Hospital) સારવાર માટે લઈ જવામાં આવ્યો હતો, પરંતુ તે દરમ્યાન રસ્તામાં જ આધેડ મુસાફરનું મોત થયું હતું.

ઘટના અંગે મળતી વિગતો અનુસાર, શુક્રવારે વહેલી સવારે બારડોલીના વરાળ ગામે રહેતા જગુભાઈ હળપતિ કામ અર્થે બારડોલી આવ્યા હતા. કામકાજ પૂર્ણ થયા બાદ બપોરના સુમારે રેલવે બસ સ્ટેશન પર ઘરે જવા ઉભા હતા. આ દરમ્યાન માંડવી જતી ST બસમાં અન્ય મુસાફરો સાથે ચઢી રહ્યા હતા. ત્યારે ડ્રાઇવરે અચાનક બસ ચાલુ કરી દેતાં જગુભાઈ હળપતિના પગ પરથી બસનું ટાયર ફરી વળ્યું અને પગ કચડાય ગયો હતો.