મોટા વરાછામાં સેવા આઇસોલેશન સેન્ટરમાં કોરોના દર્દીઓને રજા આપતી વખતે કરાય છે આ ખાસ રસમ- જેનાથી વધે છે આત્મવિશ્વાસ

સુરતના મોટા વરાછા આઇસોલેશન સેન્ટરમાં 70 વર્ષીય લાભુબેન સાવલિયા નામના દાદી સાજા થતા પરિજનોએ દર્દી, તેના સંબંધી અને સ્વયંસેવકોને લાડુ ખવડાવીને મોં મીઠા કરાવ્યા હતા. લાભુબેનના શરીરમાં ઓક્સિજન લેવલ ઘટી જતા તેને હોસ્પિટલમાં એડમિટ કરવા ડોક્ટરોએ જણાવ્યું હતું. ખાનગી હોસ્પિટલમાં બેડ ન મળતા પરિજનોએ સેન્ટરમાં રાખવાનો નિર્ણય કર્યો હતો.

જાણવા મળ્યું છે કે, મોટા વરાછામાં રહેતા 70 વર્ષીય લાભુબેન સાવલિયા ગઈ તા. 13 એપ્રિલના રોજ કોરોના પોઝિટિવ આવતા તેને મોટા વરાછા આઇસોલેશન સેન્ટરમાં એડમિટ કરવામાં આવ્યા હતા. થોડા દિવસ બાદ ઓક્સિજન લેવલ અચાનક ઘટી ગયું હતું. તેથી તબીબોએ તેને હોસ્પિટલમાં રિફર કરવા જણાવ્યું હતું. ખાનગી હોસ્પિટલમાં બેડ નહોતા. સરકારી હોસ્પિટલમાં તેઓને જવું ન હતું. તેથી, પરિજનોએ નિર્ણય કર્યો કે જે થવું હોય તે થાય, પરંતુ તેને આઇસોલેશન સેન્ટરમાં જ રાખવા છે.

બુધવારે લાભુબેન સહીત 7 દર્દીઓને રજા આપવામાં આવી હતી. દર્દી કોરોનાથી સાજા થયાની ખુશીમાં વાજતે ગાજતે ઢોલ-નગારા સાથે દર્દીને વિદાય આપવામાં આવી હતી. લાભુબેનના પરિજનોએ તે સાજા થયાની ખુશીમાં દર્દી અને સ્વયંસેવકોને લાડુ ખવડાવીને મોં મીઠું કરાવ્યું હતું.