સામાન્ય ગરીબ ખેડૂતે પ્રધાનમંત્રી મોદીને દાન કરી પોતાને મળેલી સહાયની બધી રકમ

ખેડૂતને ધરતીનો તાત કહ્યો છે. ખેડૂતો ખુબ ઉદાર હોય છે. આવી જ એક ખેડૂતની ઉદારીની ઘટના નડિયાદમાં બની. ખેડૂત દ્વારા કિસાનનિધિમાંથી મળેલી રાહત પીએમ રાહત ફંડમાં પરત આપી હતી. અહીં મહત્વપૂર્ણ વાત તે છે કે, આ ખેડૂત પાસે એક એકર કરતાં પણ ઓછી જમીન ધરાવે છે. તે છતાં પોતાને મળેલી સહાય તેમને કોરોના સામેની લડાઇમાં પીએમ કેર ફંડમાં ચેક દ્વારા પરત આપી છે.

ચંદુભાઈ દાઉદભાઈ મકવાણાનામના નડિયાદ તાલુકાના મહોળેલ ગામના ખેડૂતે ગત અઠવાડિયે મળેલી કિસાન નિધિની રાહત PM કેરમાં પરત કરતા જણાવ્યું હતું કે, ગામડાઓમાં અમુક પરિવારો પાસે આવક સ્ત્રોત શૂન્ય હોવાના કારણે તેવા લોકોને પૈસાની વધારે જરૂરત છે. ચંદુભાઈએ વધુમાં જણાવતા કહ્યું હતુ કે, ગરીબ લોકો સુધી વધારેમાં વધારે રાહત પહોંચે તે માટે સક્ષમ લોકોએ પોતાને મળેલી રાહત છોડવી જોઈએ જેથી વધારે જરૂરિયાત મંદ લોકોને ફાયદો પહોંચાડી શકાય.

ચંદુભાઈ પાસે રહેલી સીમિત જમીનમાં તેઓ ડાંગર અને ઘઉંનો પાક પકવે છે અને પોતાના પરિવારનું ગુજરાન ચલાવે છે. તેમના બે બાળકો છે. તેવામાં ચંદુભાઇએ મોટી જમીન ધરાવતા ખેડૂતો માટે એક સંદેશ છોડ્યો છે અને મજબૂર લોકોને વધારે ફાયદો પહોંચાડવા માટે આહ્વાન કર્યું છે.