નવસારી: અકસ્માતમાં સુરત અને મહેસાણાના પાંચ યુવાનોના મોત, જાણો વધુ

નવસારી હાઇવે ફરી એકવાર રક્તરંજીત બન્યો છે. અહીં આવેલા ખારેલ હાઇવે પર ટેમ્પો અને કાર વચ્ચે અકસ્માત સર્જાયો હતો, ઘટનામાં એક સાથે પાંચ યુવકોના કમકમાટીભર્યા મોત નિપજ્યા હતા. મૃતકોમાં બે મહેસાણા અને ત્રણ સુરતના રહેવાસી હોવાનું સામે આવ્યું છે.

નવસારીના ખારેલ ગામ પાસે નેશનલ હાઇવે-48 પર ગમખ્વાર અકસ્માતમાં પાંચ યુવકોના કરૂણ મોત નિપજ્યા છે. આ ઘટના બુધવારે સાંજે 6.40 કલાકે થઇ હતી. ખારેલ ઓવરબ્રિજ પસાર કર્યા બાદ આ યુવકો જે કારમાં સવાર હતા એ કાર ડિવાઇડર કુદાવીને અમદાવાદ- મુંબઇ લેનમાં ધસી ગઇ હતી જે સામેથી આવી રહેલા આઇશર ટેમ્પો સાથે જઇને અથડાઇ હતી. અકસ્માત એટલો ભયંકર હતો કે પાંચેય યુવાનોના મોત ઘટનાસ્થળે જ થઇ ગયા હતા. મૃત્યુ પામનાર પાંચેય યુવકો વરાછા(સુરત)ના હોવાની વાત સામે આવતાં વરાછા પંથકમાં અરેરાટી મચી જવા પામી છે.

5 જૂને વરાછાના પાંચ યુવાનો તેમની ટાટા માનઝા કાર લઇને દમણથી સુરત આવવાં નીકળ્યાં હતા. એ સમયે ખારેલ ઓવરબ્રિજ નજીક સાંજના 6.40ના સુમારે કારચાલકે કાર પરનું નિયંત્રણ ગુમાવી દેતાં તે કાર ડિવાઇડર કુદીને અમદાવાદ-મુંબઇ લેન પર ઘસી જઇને આઇશર ટેમ્પા સાથે ધડાકાભેર અથડાઇ હતી. આ અકસ્માતનો અવાજ સાંભળીને મોટી સંખ્યામાં લોકો ઘટનાસ્થળે પહોંચ્યા હતા. કારમાં સવાર પાંચેય યુવાનો મૃત અવસ્થામાં જ હોવાનું બહારથી જ દેખાઇ આવતું હતું. આગળ બેસેલા બે યુવાનોની લાશે લોકોએ બહાર કાઢી હતી પરંતુ પાછળ બેસેલા ત્રણ યુવાનોની લાશ કાઢવા માટે 1 કલાકનો સમય લાગ્યો હતો. કારમાંથી એક આધાર કાર્ડ મળી આવ્યું હતું જે સુરતના લંબે હનુમાન રોડ પર રહેતા હેત વસંતભાઇ પટેલનો હતો.