સુરતના માથે તોળાઈ રહ્યું છે મોટું સંકટ, સંયુક્ત રાષ્ટ્રની એજન્સીએ કરી છે આ આગાહી

સમુદ્ર સપાટી ઊંચી આવી રહી હોવાથી સદીના અંત ભાગમાં ભારતનાં ચાર સાગરકાંઠાનાં શહેરો- સુરત, કોલકાતા, મુંબઇ અને ચેન્નાઇ સામે મોટા જોખમ ઊભા થવાની ભીતિ છે. જ્યારે હિમાલયનાં હિમક્ષેત્રો ઓગળી રહ્યાં હોવાથી ઉત્તર ભારતનાં સંખ્યાબંધ શહેરોમાં પાણીની અછત સર્જાવાની સંભાવના જોવાઈ રહી છે. જળવાયુ પરિવર્તન અંગેની સંયુક્ત રાષ્ટ્ર એજન્સીએ આવી આગાહી વ્યક્ત કરી છે.

ઇન્ટરગવર્નમેન્ટલ પેનલ ઓન ક્લાઇમેટ ચેન્જ (IPCC)નું કહેવું છે કે, સમુદ્ર સપાટી પહેલાં કરતાં ખૂબ ઝડપથી વધી રહી છે, અને બરફ ખૂબ ઝડપથી ઓગળી રહ્યો હોવાથી વર્ષ ૨૧૦૦ સુધીમાં સમુદ્ર સપાટી એક મીટર જેટલી વધતાં વિશ્વના ૧.૪ અબજ લોકો તેનાથી પ્રભાવિત થવાની સંભાવના છે. એજન્સીનું કહેવું છે કે ભારતના ચાર શહેર- સુરત, કોલકાતા, મુંબઇ અને ચેન્નાઇ સહિતના વિશ્વના ૪૫ શહેરોની સ્થિતિ તો એવી છે કે માત્ર ૫૦ સે.મી. સમુદ્ર સપાટી ઊંચી આવે તો પણ આ શહેરોમાં ભારે પૂર આવ્યાં હોય તેવી સ્થિતિ સર્જાઈ શકે તેમ છે.