રાજકોટમાં ખાનગી બસ ચાલકે લીધો માસુમનો જીવ- ઘટના સ્થળે જ 12 વર્ષીય કિશોરનું કમકમાટી ભર્યું મોત

રાજકોટ(Rajkot): શહેરમાં અકસ્માત (Accident in Rajkot)ની વધુ એક ઘટના સામે આવતા ચકચાર મચી જવા પામી છે. હજુ 2 દિવસ પહેલા જ શહેરના પોશ વિસ્તારમાં પૂરપાટ ઝડપે આવતી કારે યુવતીને જોરદાર ટક્કર મારી અડફેટે લીધી હતી. ત્યારે આજરોજ ફરી એક જીવલેણ અકસ્માતનો બનાવ સામે આવ્યો છે. જેમાં ટેલિફોન એક્સચેન્જ પાસે ઓવરબ્રિજ પર ખાનગી બસ (Private bus accident)ની અડફેટે કાકા-કાકી સાથે બાઈક પર જતાં 12 વર્ષીય ભત્રીજાનું મોત (Boy died) નિપજ્યું હોવાનું સામે આવ્યું છે. દર્દનાક અકસ્માતને પગલે ડ્રાઈવર બસ મૂકીને ફરાર થતા પોલીસ દ્વારા બસ કબ્જે કરી વધુ તપાસ હાથ ધરવામાં આવી છે.

અકસ્માત માં 12 વર્ષીય કિશોરનું કમકમાટી ભર્યું મોત:

મળતી માહિતી અનુસાર, રાજકોટના 150 ફૂટ રિંગરોડ પર રૈયા ટેલીફોન એક્સચેન્જ ખાતેના ઓવરબ્રિજ ઉપર એક ખાનગી બસે બાઈકને અડફેટે લેતા ગોઝારો અકસ્માત સર્જાયો હતો. જેમાં બાઈક પર કાકા અને કાકી સાથે જતા 12 વર્ષના ઉદયરાજસિંહ વિરલસિંહ ચુડાસમાનું ઘટના સ્થળે જ કમકમાટી ભર્યું મોત નિપજ્યું હતું. સમગ્ર ઘટનાને પગલે લોકોના ટોળેટોળા એકઠા થઇ જતા જ ધન્વીર ટ્રાવેલ્સ લખેલી બસનો ડ્રાઈવર બસ મુકીને ફરાર થઇ ગયો હતો.