ગુજરાતના ગૌરવને લાંછન લગાવતો કિસ્સો- અંધશ્રદ્ધાના નામે 30 વર્ષની યુવતીનું આપવામાં આવ્યું બલિદાન 

બનાસકાંઠા(ગુજરાત): આજકાલના લોકો અંધશ્રદ્ધા પાછળ દોટ મૂકી રહ્યા છે. અંધશ્રદ્ધામાં લોકો શું કરી બેસે તેની પણ ખબર નથી રહેતી. હાલમાં એવા ઘણા કેસો સામે આવી રહ્યા છે જેમાં લોકો અંધશ્રદ્ધામાં આવીને મુસીબતને આમંત્રણ આપતા હોય છે. તાંત્રિકો તેમના તંત્ર મંત્રથી લોકોને પોતાની જાળમાં ફસાવીને ખરાબ કામ કરતા હોય છે. આજના અત્યાધુનિક સમયમાં હજી પણ એવા કેટલાક વિસ્તારો છે, જ્યાં ભૂત, ચુડેલ, જિન જેવી બાબતો પર લોકોને વિશ્વાસ છે. આ અંધવિશ્વાસના કારણે કેટલીકવાર માણસ ભારે તકલીફ વેઠે છે અને ક્યારેક તેને જીવથી પણ હાથ ધોવા પડે છે. ત્યારે આજરોજ આવી જ એક ઘટના ગુજરાતના બનાસકાંઠામાંથી સામે આવી છે.

એક પરિવારના આગ્રહ અને અંધશ્રદ્ધાએ શનિવારે એક દીકરીની હત્યા કરી હતી. પરિવાર 18 કલાક સુધી રૂમને તાળું મારીને મેલીવિદ્યા કરતો રહ્યો હતો. છોકરીની આસપાસ તેને ઘેરીને બેસી રહ્યા હતા. જમીન પર પડેલી તે છોકરી ક્યારે મૃત્યુ પામી, કોઈને ખબર પણ રહી ન હતો. બાળકીના મૃત્યુ બાદ જ્યારે પડોશીઓએ પોલીસને ફોન કર્યો મેલીવિદ્યાનો ભય પોલીસને પણ બતાવવામાં આવ્યો હતો. આખરે પોલીસ બાળકીને હોસ્પિટલ લઈ ગઈ પરંતુ તે પહેલેથી જ મૃત હતી.

આ મેલીવિદ્યા બીજા કોઈએ નહીં પરંતુ પરિવારની માત્ર 12 માં ધોરણમાં ભણતી છોકરીની નાની બહેન દ્વારા કરવામાં આવી હતી. તે 5 બહેનોમાં સૌથી નાની છે. થોડા સમય પહેલા પિતાનું અવસાન થયું હતું. પરિવાર માને છે કે, 12 માં ધોરણમાં ભણતી બહેનમાં તેના પિતાનો આત્મા આવે છે અને તે જ આત્મા પરિવાર પર આવતી આફતો અને રોગોને દૂર કરે છે. ફક્ત આ અંધશ્રદ્ધાને કારણે 30 વર્ષીય મોટી બહેન કે, જેઓ બંધ ઓરડામાં બીમાર પડી ગયા હતા. તેમની જાદુગરી દ્વારા સારવાર કરવાનો પ્રયાસ કરવામાં આવી રહ્યો હતો.

મળતી માહિતી મુજબ, આ પરિવારના સભ્યો પણ એકબીજા પર હુમલો કરી રહ્યા હતા. આ જ કારણ હતું કે, મૃત્યુ પામેલી છોકરીના ચહેરાની સાથે પરિવારના અન્ય સભ્યોને પણ ગંભીર ઈજાના નિશાન હતા. આવી સ્થિતિમાં, હવે પોલીસ મૃત્યુના કારણ પર નવેસરથી તપાસ કરશે.