પોલીસ કર્મચારીઓ બાદ હવે સરકારી વિદ્યા સહાયકોના સોશિયલ મીડિયામાં કેજરીવાલ છવાયા- જાણો શું છે નવી જાહેરાત

ગુજરાત(Gujarat): રાજ્યમાં વિધાનસભાની ચૂંટણીને લઈને ભણકારા વાગી રહ્યા છે. જેમાં છેલ્લા અઢી દાયકા કરતાં વધુ સમયથી ભાજપ(BJP) સત્તામાં બેઠી છે. હાલમાં તો કોંગ્રેસ(Congress) ભાજપને ટક્કર આપી શકે તેવું લાગતું નથી. પરંતુ આમ આદમી પાર્ટી(AAP) વિધાનસભાની ચૂંટણીમાં ભાજપને ટક્કર આપવા માટે મેદાનમાં ઉતરી છે. આમ આદમી પાર્ટીના સંયોજક અને દિલ્હીના મુખ્યમંત્રી અરવિંદ કેજરીવાલ(Arvind Kejriwal) સતત ગુજરાત પ્રવાસે આવી રહ્યા છે અને સતત ગુજરાતની જનતાને ગેરંટીઓ આપી રહ્યા છે. ત્યારે ગઈકાલે ફરી એકવાર અરવિંદ કેજરીવાલ ગુજરાતની મુલાકાતે આવ્યા હતા. આ દરમિયાન ભુજ(Bhuj)માં ટાઉનહોલ કાર્યક્રમમાં ગુજરાતની જનતાને શિક્ષણની ગેરંટી આપવામાં આવી હતી.

આ ટાઉનહોલ કાર્યક્રમ દરમિયાન વિદ્યાસહાયકને લઈને પ્રશ્ન પૂછવામાં આવ્યો હતો ત્યારે તેના પ્રત્યુતરમાં અરવિંદ કેજરીવાલે જવાબ આપતા કહ્યું હતું કે, ઘણા બધા વિદ્યા સહાયકો છે અને તેમના પણ ઘણા બધા મુદ્દા છે. જેમ કે સમયસર TET નથી થતું, TAT પણ નથી થતું, સર્ટીફીકેટની સમસ્યા હોય તો ભરતી થતી નથી. મારી તમારા સૌને વિનંતી છે કે, ચૂંટણીને ફક્ત ત્રણ મહિના જ બાકી રહ્યા છે, જેટલા પણ વિદ્યા સહાયકો છે તેઓ આમ આદમી પાર્ટીનો પ્રચાર કરો અને ત્રણ મહિના પછી આમ આદમી પાર્ટીની સરકાર બનશે ત્યારે તમારા બધા મુદ્દાઓના ઉકેલ લાવવાની ગેરંટી મારી.