દિલ્હીથી લંડન જતી એર ઇન્ડિયાની ફ્લાઇટને બોમ્બથી ઉડાવી દેવાની ધમકી

દિલ્હીના ઇન્દિરા ગાંધી ઇન્ટરનેશનલ (IGI) એરપોર્ટ પર સુરક્ષા અધિકારીઓને શુક્રવારે મોડી રાત્રે લંડન જતી એર ઇન્ડિયાની ફ્લાઇટ પર બોમ્બ ધમકીનો ફોન આવ્યો હતો. ત્યારથી એરપોર્ટ કેમ્પસ એલર્ટની સ્થિતિમાં છે. દિલ્હી પોલીસે કહ્યું કે, કોલ કરનાર યુએસમાં 9/11 હુમલાની તર્જ પર લંડન જતી એર ઇન્ડિયાની ફ્લાઇટને ઉડાવી દેવાની ધમકી આપી છે.

પોલીસના જણાવ્યા મુજબ, ગુરુવારે રાત્રે બાહ્ય દિલ્હીના રણહોલા પોલીસ સ્ટેશનમાં બોમ્બ ધમકીનો કોલ આવ્યો હતો, જેને પગલે IGI એરપોર્ટ પર સુરક્ષાને એલર્ટ કરવામાં આવી હતી.

ન્યૂઝ એજન્સી ANIએ દિલ્હી પોલીસના અધિકારીઓને ટાંકીને જણાવ્યું હતું કે, અમને લંડન જવાના વિમાન વિશે બોમ્બ ધમકીનો ફોન આવ્યો હતો. તેમણે કહ્યું કે ગુરુવારે રાત્રે 10.30 વાગ્યે, બાહ્ય દિલ્હીના રણહોલા પોલીસ સ્ટેશનના લેન્ડલાઇન નંબર પર કોલ આવ્યો. ફોન કરનારે કહ્યું કે, લંડન માટે એર ઇન્ડિયાની ફ્લાઇટ અમેરિકામાં 9/11 હુમલાની તર્જ પર બોમ્બથી ઉડાવી દેવામાં આવશે.

દિલ્હી પોલીસને શુક્રવારે એક અલગ ધમકી કોલ પણ મળ્યો હતો, જેમાં ચેતવણી આપવામાં આવી હતી કે અજાણ્યા લોકો દિલ્હી એરપોર્ટ પર કબજો કરવા માગે છે. સમાચાર એજન્સીએ અહેવાલ આપ્યો છે કે, પોલીસે આ મામલે તપાસ શરૂ કરી છે અને હાલમાં સંખ્યાઓ જાણવાનો પ્રયાસ કરી રહી છે.