ચૂંટણીના માહોલ વચ્ચે ગુજરાતમાં વધુ એક ભાજપના નેતાની થઇ ધરપકડ- જાણો એવો તો શું છે ગુનો

ગુજરાતમાં 6 મહાનગરપાલિકાઓની ચૂંટણી માટે ઉમેદવારોની યાદી જાહેર થતાં જ ટિકિટ વિતરણને લઈને ભારે હોબાળો મચી ગયો હતો. ગુજરાત રાજ્યમાં હાલ સ્થાનિક સ્વરાજની ચૂંટણીનો ગરમાવો જણાય રહ્યો છે. ગુજરાતમાં સ્થાનિક સ્વરાજ્યની ચૂંટણીની તારીખ જાહેર થતાની સાથે જ રાજકીય પાર્ટીઓ સતર્ક થઈ ગઈ છે. હવે વોટ માંગવા માટે ઘરે -ઘરે જઈને મતદારોને રિજવી પણ રહ્યા છે. તમામ પાર્ટીઓ પોતાના પક્ષના ઉમેદાવારો માટે મેદાનમાં ઉતરી એડીચોટીનું જોર લગાવી રહી છે.

આવી સ્થિતિ વચ્ચે ગુજરાતમાં આવેલ નવસારીમાં ભાજપના નેતા જુગાર રમતા ઝડપાયા હોવાનું ચર્ચાઈ રહ્યું છે. હાલમાં તેમની ધરપકડ કરવામાં આવી છે. ચૂંટણીના માહોલ વચ્ચે ભાજપ નેતાની ધરપકડ થતાં સમગ્ર વિસ્તારમાં ચકચાર મચી ગઈ હતી.

નવસારીમાં પત્નીને અપક્ષ ઉમેદવારી કરાવનાર ભાજપ લઘુમતી મોરચાના ઉપપ્રમુખ મકસુદ રાઠોડની જુગારના કેસમાં પોલીસે ધરપકડ કરી છે. મકસુદ રાઠોડ જુગારના કેસમાં ઘણા સમયથી વોન્ટેડ હતો. ભાજપે તેને ટિકિટ ન આપતા માલુ તાલુકા પંચાયત બેઠક ઉપર તેની પત્નીએ અપક્ષ રીતે ઉમેદવારી નોંધાવી છે.

મકસુદ વોન્ટેડ હોવા છતાં ખુલ્લેઆમ ફરતો હતો. ભાજપે મકસુદ રાઠોડને પેજ પ્રમુખની પણ જવાબદારી સોંપી હતી. એટલું જ નહીં બોડેલીમાં સી.આર.પાટીલની સભામાં પણ તે હાજર રહ્યો હતો. વોન્ટેડ હોવા છતાંય તેના પર જાણે ચાર હાથ હોય તેમ ઉચ્ચ પોલીસ અધિકારીઓને પણ બિંદાસ રીતે મળતો હતો. પરંતુ ભાજપ સાથે બળવો કરતા જ તેની ધરપકડ થઈ. ત્યારે નવસારીમાં લોકમુખે એમ પણ ચર્ચાઈ રહ્યું છે કે ભાજપની ગુનાખોરી અને ભયની રાજનીતિ ખુલ્લી પડી છે.