સતત ત્રીજા દિવસે સુરત સિવિલમાં હડતાલ- અડધી રાતે ગર્ભવતી મહિલા સહિત છ દર્દીઓ સારવાર વિના રઝળ્યા

સુરત(ગુજરાત): ત્રીજા દિવસે પણ કોવિડ કાળમાં બોન્ડેડ યોજના હેઠળ બમણો લાભની માંગણીઓ સાથે હડતાળ ઉપર ઉતરેલા નવી સિવિલ હોસ્પિટલના રેસિડન્ટ ડોકટરોએ હઠાગ્રહ કેળવી કામથી અળગા રહ્યાં હતાં. જેને કારણે આખા દક્ષિણ ગુજરાતના દર્દીઓ તથા પરિવારજનોને મુશ્કેલીનો સામનો કરવો પડી રહ્યો છે. હડતાળના કારણે લોકોના જીવ જોખમમાં મુકાઇ રહ્યાં હોવાના બનાવ પણ જોવા મળી રહ્યા છે. રેસિડન્ટ ડોકટરોને મનાવવાના તમામ પ્રયોસો કર્યા પછી સિવિલ સુપ્રિટેન્ડન્ટે હડતાળ ન સમેટાય તો એપેડેમિક એક્ટ મુજબ કાર્યવાહી કરવામાં આવશે તેવા સંકેત આપવામાં આવ્યા છે.

હડતાળ ઉપર ઉતરેલા રેસિડન્ટ તબીબોના કારણે નવી સિવિલની વ્યવસ્થા તૂટી પડી છે. કેઝ્યુલિટી વિભાગમાં પણ ગુરૂવારે તેની અસર જોવા મળી હતી. મધરાતે કટોકટીમાં આવેલાં કુલ 6 દર્દીઓને તબીબોની ગેરહાજરીમાં એક પછી એક સ્મીમેરમાં રેફર કરી દેવામાં આવ્યા હતાં. સિવિલ સત્તાધિશોને બહારથી ડોકટરો સહિતનો મેડિકલ સ્ટાફ બોલાવવાની જરૂર પડી છે. સુપ્રિટેન્ડ ડો. ગણેશના જણાવ્યા અનુસાર, તાત્કાલિક ધોરણે બહારથી 26 મેડિકલ ઓફિસર તથા 28 ટ્યુટર મંગાવી લેવાયા છે.

જ્યારે સર્જન વિભાગના 42 જેટલા ડોકટરોને પણ અલગ-અલગ નિમણૂંક અપાઇ છે. 9 આસિસ્ટન્ટ પ્રોફેસરને પણ જવાબદારી સોંપાવામાં આવી છે. તંત્રના ધ્યાને આવ્યું હતું કે, હોસ્પિટલ પરિસરની કોવિડ હોસ્પિટલમાં પણ તબીબોને ગેરહાજરીથી કામગીરી પ્રભાવિત છે. જેના કારણે સિવિલ સુપ્રિટેન્ડન્ટે મોર્નિંગ મિટિંગમાં જ ટીબી વિભાગના તબીબોને કોવિડ હોસ્પિટલમાં ગોઠવી દેવાની સુચના આપી હોવાનું સામે આવ્યું હતું.