ચૂંટણી પહેલા AAP ના ઉમેદવારનું અપહરણ કરીને ભાજપ લોકશાહીનું ચીરહરણ કરી રહી છે: આપ નેતા સંજય સિંહ

ગુજરાત(Gujarat Election 2022): સંજય સિંહે જણાવ્યું કે, ગુજરાતમાં ભાજપ એટલી દયનીય હાલતમાં પહોંચી ગઈ છે કે, ચૂંટણી પહેલા ઉમેદવારોના અપહરણ કરાવી રહી છે. આમ આદમી પાર્ટીના રાજ્યસભા સાંસદ સંજય સિંહે એક મહત્વપૂર્ણ મુદ્દા પર મીડિયાને સંબોધતા કહ્યું કે, ગુજરાતમાં ભાજપ એટલી દયનીય હાલતમાં પહોંચી ગઈ છે કે તે ચૂંટણી પહેલા ઉમેદવારનું અપહરણ કરવા પર ઉતરી આવી છે. ચૂંટણી પહેલા પોતાની હાર માની ચુકી છે, ચૂંટણી પહેલા લોકશાહીનું ગળું દબાવવા પર ઉતરી આવી છે.

સુરત પૂર્વ વિધાનસભામાંથી આમ આદમી પાર્ટીના ઉમેદવાર તરીકે કંચન જરીવાલાને પસંદ કર્યા હતા. તેઓ પહેલેથી જ પાર્ટી માટે પ્રચાર કરી રહ્યા હતા અને ગઈકાલે ભાજપના કેટલાક ગુંડાઓ અને બદમાશો તેમને રિટર્નિંગ ઓફિસરની ઓફિસમાં લઈ ગયા અને કંચન જરીવાલાનું નોમિનેશન રદ કરાવવાનો પ્રયાસ કર્યો અને જ્યારે તેમનું નોમિનેશન કેન્સલ ન થયું ત્યારે કંચન જરીવાલાનું અપહરણ કરીને તેમને લઈ ગયા છે. ભાજપ અલગ-અલગ રાજ્યોમાં સરકારને ઉથલાવી પાડવા માટે ધારાસભ્યોનું અપહરણ કરે છે,

ગોવા, કર્ણાટક, મધ્યપ્રદેશ, ઉત્તરાખંડ, અરુણાચલ પ્રદેશ હોય કે પછી મહારાષ્ટ્ર. ગુજરાતમાં લોકશાહીનું ગળું દબાવીને ચૂંટણી પ્રક્રિયાની મજાક ઉડાવીને ભારતીય ચૂંટણી પંચને પડકાર ફેંકતા ભાજપે આપના ઉમેદવારનું અપહરણ કર્યું. અમારો ઉમેદવાર ગઈકાલથી ગુમ છે. આજે અમારો આખો પક્ષ ચિંતિત છે, લીડરશીપ ચિંતિત છે, સુરતનું સંગઠન ચિંતિત છે અને ગોપાલ ઈટાલીયા, મનોજ સોરઠીયા સહિત દરેકને ચિંતા છે કે અમારો ઉમેદવાર ક્યાં છે? તેમના ઘરે તાળું મારેલું છે.

હું ભાજપને કહેવા માંગુ છું કે જો તમારે ચૂંટણી લડવી હોય તો ચૂંટણી લડો અને તમારી 27 વર્ષની ઉપલબ્ધિઓ જણાવો. જેમ કે અરવિંદ કેજરીવાલ કહી રહ્યા છે કે તેઓ કેવી રીતે 300 યુનિટ મફત વીજળી આપશે, તેઓ કેવી રીતે ₹ 3000 બેરોજગારી ભથ્થું આપશે, તેઓ કેવી રીતે ગુજરાતની વ્યવસ્થાને ઠીક કરશે. અમારા મુખ્યમંત્રી પદના દાવેદાર ઇસુદાન ગઢવી કહી રહ્યા છે કે તેઓ કેવી રીતે ખેડૂતો, યુવાનો, માતાઓ અને બહેનોના પ્રશ્નો હલ કરશે.