બુલડોઝર ચલાવતા સાશકોના નિર્ણયને સારું ગણાવી રાક્ષસી હાસ્ય કરતા “ભક્તો” આ દિવ્યાંગની વેદના સાંભળશે?

મધ્યપ્રદેશ(Madhya Pradesh): ખરગોનમાં થોડા દિવસ પહેલા જે હિંસાની આગ ફાટી નિકળી હતી તેમાં જે દોષી હોય તેમની સામે કડક કાર્યવાહી થવી જ જોઇએ પણ એ સાથે એ પણ ધ્યાનમાં રાખવું જરૂરી છે કે, કાર્યવાહી કરવાની લ્હાયમાં કોઇ નિદોર્ષ વ્યક્તિનો ભોગ લેવાઇ ન જાય. ત્યારે કરવામાં આવી રહેલી કાર્યવાહી દરમ્યાન ખરગાનોમાંથી આવી જ એક ઘટના સામે આવી છે. એક વ્યકિતના બનેં હાથ 2005 માં જ કપાઇ ગયેલા હતા છતા તંત્રએ રમખાણનો આરોપી મુકીને તેની દુકાન તોડી પાડી હતી.

થોડા દિવસ પહેલા મધ્યપ્રદેશના ખરગોનમાં ફાટી નીકળેલી હિંસા બાદ પ્રશાસન આરોપીઓના ઘર પર બુલડોઝર ચલાવવાની કાર્યવાહી કરી રહ્યું છે. આ ઘટનામાં, વસીમ શેખ નામના આવા વ્યક્તિની દુકાન બુલડોઝરથી તોડી પાડવામાં આવી છે, જેના બંને હાથ 2005માં એક અકસ્માતમાં કપાઈ ગયા હતા. વસીમ શેખ પોલીસ-પ્રશાસનની નજરમાં રમખાણોનો આરોપી છે. મળતી માહિતી અનુસાર, વસીમ શેખના પરિવારમાં કુલ 5 સભ્યો છે અને સરકારી તંત્રના બુલડોઝર દ્વારા જે દુકાનને તોડી પાડવામાં આવી છે. તેનાથી જ પરિવારનું ગુજરાન ચાલતુ હતું. હવે વસીમ શેખ પાસે પરિવારનું ભરણ-પોષણ કરવા માટે કઈ નથી. વસીમ શેખ બે બાળકોનો પિતા છે.

2005માં વસીમ શેખને વીજ કરંટ લાગ્યો હતો. તે દરમ્યાન તેને ગંભીર ઈજાઓ થઈ હતી અને તે દરમ્યાન તેના બંને હાથ કાપવા પડ્યા હતા. હાલમાં વસીમ 35 વર્ષનો છે. મીડિયા સાથેની ખાસ વાતચીતમાં વસીમેં પોતાનું દુઃખ વ્યક્ત કરતા કહ્યું, મારી દુકાન તોડી પાડવામાં આવી છે, જેમાં હું એક નાનો ધંધો કરતો હતો. જેના આધરે પરિવારનું ગુજરાન ચાલતું હતું. વસીમ શેખે કહ્યું, “વહીવટીતંત્રે છોટી મોહન ટોકીઝ પાસે આવેલા મારા રોડની બાજુના ડમ્પ પર બુલડોઝર ચાલુ કર્યું. આ સ્થળ પથ્થરબાજી સ્થળથી લગભગ 2 કિલોમીટર દૂર છે.

વસીમે વધુમાં જણાવતા કહ્યું કે, મારી જે નાની દુકાન તોડી નાંખવામાં આવી તેમાં હું કેન્ડી વેચતો હતો અને મારા પરિવારનું ભરણપોષણ કરતો હતો. હું કેવી રીતે હુલ્લડ કરી શકું, હું પાણી માટે પણ બીજા પર નિર્ભર છું. મારી પાસે મારા બે બાળકો, પત્ની અને માતાને ખવડાવવા માટે કોઈ સાધન નથી. આ ઉપરાંત, તંત્ર દ્વારા આ માટે તેને કોઈ નોટિસ પણ મળી નથી જેથી તે સમયસર સામાન સુરક્ષિત રીતે બહાર કાઢી શકે.