અસ્થિ વિસર્જન કરીને પાછા આવી રહ્યા હતા,રસ્તામાં નડ્યો અકસ્માત, 8ના મોત

મહારાષ્ટ્રના યવતમાલમાં એક પિકઅપ વેન પુલ નીચે પડી જવાથી 8 લોકોના મોત થયા છે, જેમાં 18 લોકોને ઈજા થઈ છે. અકસ્માતનો ભોગ બનનાર પરિવારજનો કોઠેશ્વર મંદિરમાં સંબંધીની અસ્થિનું વિસર્જન કરવા માટે ગયા હતા. વિધિ પૂરી કર્યા બાદ તેઓ જોડમોહા પરત ફરી રહ્યાં હતા.

તે દરમિયાન ડ્રાઈવરે નિયંત્રણ ગુમાવી દીધું અને વેન ઝાડ સાથે અથડાઈને પુલ પરથી 25 ફૂટ નીચે પડી હતી. આ અકસ્માતને નજરે જોનારના જણાવ્યા મુજબ ઘટનામાં 6 લોકોના સ્થળ પર જ મોત થયા હતા. આ સિવાય અન્ય બે લોકોના સારવાર દરમિયાન મોત થયા હતા.

આ ઘટનાની જાણ થતા લોકો મદદ માટે અકસ્માત સ્થળે પહોંચ્યા હતા. આસપાસના પોલીસ સ્ટેશનની પોલીસ અને અધિકારીઓ પણ ઘટના સ્થળે પહોંચ્યા હતા. ઘાયલોને હાલ જિલ્લા હોસ્પિટલમાં સારવાર માટે દાખલ કરવામાં આવ્યા છે.