ભારતમાં કોરોના અને ઓમિક્રોન બેકાબુ! 90 હજારથી વધુ કેસ સામે આવતા મચ્યો ફફડાટ

દેશમાં કોરોના(Corona) વાયરસનો કહેર ફરી એકવાર ચરમસીમાએ છે. કોવિડ-19ના નવા કેસોમાં જબરદસ્ત ઉછાળો જોવા મળી રહ્યો છે. ગુરુવારે, છેલ્લા 24 કલાકમાં દેશભરમાં 90,928 નવા COVID-19 કેસ નોંધાયા છે, જે બુધવાર કરતાં 56.5 ટકા વધુ છે. ગઈકાલે 58,097 નવા કોરોના કેસના રિપોર્ટ આવ્યા હતા. છેલ્લા 24 કલાકમાં કોરોના સંક્રમણને કારણે 325 લોકોના મોત થયા છે. દેશમાં કોરોનાને કારણે જીવ ગુમાવનારા લોકોની કુલ સંખ્યા 4,82,876 પર પહોંચી ગઈ છે.

તે જ સમયે, ઓમિક્રોન(Omicron) વેરિઅન્ટથી સંક્રમિત દર્દીઓની સંખ્યા પણ 2000ને વટાવી ગઈ છે. રાજધાની દિલ્હીની વાત કરીએ તો અહીં પણ સ્થિતિ ખરાબ છે. હવે અહીં 10 હજારથી વધુ કેસ આવવા લાગ્યા છે, જે ચિંતાજનક છે.

દેશમાં કોરોનાના નવા કેસોમાં જોરદાર ઉછાળાની સરખામણીમાં સાજા થતા દર્દીઓની ઓછી સંખ્યાને કારણે સક્રિય કેસ પણ ઝડપથી વધી રહ્યા છે. કેન્દ્રીય સ્વાસ્થ્ય મંત્રાલયના ડેટા અનુસાર, સક્રિય કેસોની સંખ્યા વધીને 2,85,401 થઈ ગઈ છે એટલે કે 2,85,401 દર્દીઓ કોરોનાની સારવાર લઈ રહ્યા છે. છેલ્લા 24 કલાકમાં 19,206 દર્દીઓ સંક્રમણથી મુક્ત થયા છે. તે જ સમયે, અત્યાર સુધીમાં કુલ 3,43,41,009 લોકો કોરોનાને હરાવીને લડાઈ જીતવામાં સફળ થયા છે.