બાળપણથી જ મુક-બધીર આ દીકરીએ ઓલિમ્પિકમાં જીત્યો ગોલ્ડ મેડલ, જાણો ગૌરાંશીની સંઘર્ષભરી કહાની

ઉંમર 15 વર્ષ, જન્મથી સાંભળી કે બોલી શકતી નથી. આમ છતાં બેડમિન્ટન પ્રત્યેનો એવો જુસ્સો વધ્યો કે તેણે દેશ ઉપરાંત વિદેશમાં પણ સફળતાની ધૂમ મચાવી. આ છે કોટાની દીકરી ગૌરાંશી. રામગંજમંડીની રહેવાસી ગૌરાંશી જન્મથી જ મુક-બધીર છે. ગૌરાંશીએ મે મહિનામાં બ્રાઝિલમાં આયોજિત ડેફ ઓલિમ્પિક ગેમ્સમાં બેડમિન્ટનમાં દેશને જીત અપાવીને ગોલ્ડ જીત્યુ છે. આ જીતનો જશ્ન બ્રાઝિલથી લઈને રામગંજમંડી સુધી મનાવવામાં આવી રહ્યો છે. રામગંજમંડી પહોંચતા જ ગૌરાંશીનું ભવ્ય સ્વાગત કરવામાં આવ્યું હતું. 16 કિલોમીટર સુધી ફૂલોનો વરસાદ થયો હતો.

વિજયના આ તબક્કે પહોંચવાની ગૌરાંશીની સફર સરળ ન હતી. તેણે એક વખત મૃત્યુને પણ હરાવ્યું છે. ગૌરાંશી જન્મથી જ મુક-બધીર છે. બે વર્ષની ઉંમરે રમતાં-રમતાં ઊકળતું દૂધ તેમના પર પડ્યું. જેના કારણે તે પચાસ ટકા દાઝી ગઈ હતી. અડધું શરીર બળી ગયું હતું. ડોક્ટરો પણ એક વખત હારી ગયા હતા, પરંતુ 6 મહિનાની સારવાર બાદ પણ માતા-પિતાએ હિંમત હારી ન હતી. આખરે, ગૌરાંશી સ્વસ્થ થઈને ઘરે પરત ફરી હતી. તે જ સમયે, પિતા ગૌરવ શર્મા અને માતા પ્રીતિ શર્માએ નક્કી કરી લીધું છે કે, તેઓ પુત્રીને તે સ્થાન પર લઈ જશે કે તે અન્ય લોકો માટે ઉદાહરણ બની શકે.

ગૌરાંશીના માતા-પિતા પણ મુક-બધીર છે. તેઓ સૌપ્રથમ ગૌરાંશીને સ્વિમર બનાવવા માંગતા હતા, પરંતુ તેમની રુચિ બેડમિન્ટનમાં હતી, તેથી તેમને બેડમિન્ટનમાં વિશેષ કોચિંગ એકેડમીમાં પ્રવેશ કરાવ્યો. ગૌરાંશીએ સાત વર્ષની ઉંમરે રમવાનું શરૂ કર્યું. તે દિવસમાં આઠ કલાક પ્રેક્ટિસ કરે છે. સાયકલ 20 કિ.મી. ત્યાર બાદ પાંચ કિલોમીટરની દોડ. આ સફળતામાં તેના પિતા અને માતાનો મોટો ફાળો છે. ગૌરાંશીની મધ્ય પ્રદેશ સરકાર દ્વારા 2020 માં એકલવ્ય ખેલ પુરસ્કાર માટે પણ પસંદગી કરવામાં આવી હતી.