દૂધસાગર ડેરીના કર્મચારીને ભરખી ગયો કાળ- બે બાઈક વચ્ચે જોરદાર ટક્કર થતા નીપજ્યું કરુણ મોત

ગુજરાત(Gujarat): રાજ્યમાં અવારનાવર અનેક અકસ્માતો થાય છે જેમાં નિર્દોષ વ્યક્તિઓ પોતાનો જીવ ગુમાવી બેસે છે. ત્યારે આવો જ એક અકસ્માત(Accident) સામે આવ્યો છે. જેમાં બે બાઈક વચ્ચે જોરદાર ટક્કર થતા એક વ્યક્તિનું કરુણ મોત નીપજ્યું હતું. જ્યારે અન્ય બે યુવકોને ગંભીર ઈજા પહોચી હતી.

વિસનગર(Visnagar) તાલુકાના ઉદલપુર(Udalpur) નજીક શનિવારના રોજ ભર બપોરે બે બાઇક વચ્ચે થયેલા અકસ્માતમાં દૂધસાગર ડેરી(Dudhsagar Dairy)માં નોકરી કરતા 40 વર્ષીય વ્યક્તિનું કરુણ મોત થયું હતું, જ્યારે અન્ય બે યુવાનોને ગંભીર રીતે ઇજાગ્રસ્ત થયા હતા, જેમાં એકની હાલત અત્યંત ગંભીર હોવાનું જાણવા મળ્યું હતું. ઉદલપુર નજીક શનિવારના રોજ ભર બપોરે 12:30 વાગે બાઈક નં. જીજે 18 ડીબી 7530 અને જીજે 02 બીક્યુ 5462 વચ્ચે જોરદાર અકસ્માત સર્જાઈ જવા પામ્યો હતો.

જેમાં દૂધસાગર ડેરીમાં નોકરી કરી રહેલા મહેસાણા તાલુકાના ધાંધુસણ ગામના ઠાકોર કરસનજી માનસંગજીનું કરુણ મોત નીપજ્યું હતું, જ્યારે વિજાપુર તાલુકાના આગલોડ ગામના રાવળ વિજયભાઈ ગોવિંદભાઈ અને હસનાપુર ગામના ચાવડા પરાગભાઈ મગનભાઈ ગંભીર રીતે ઈજાગ્રસ્ત થતા તેમને સારવાર અર્થે મહેસાણા સિવિલમાં ખસેડવામાં આવ્યા હતા. જેમાં પરાગ ભાઈ ચાવડાની હાલત અત્યંત ગંભીર હોવાનું જાણવા મળ્યું છે. પોલીસને જાણ થતાં પોલીસનો કાફલો ઘટના સ્થળે દોડી આવ્યો હતો. મૃતકનું મહેસાણા સિવિલમાં પોસ્ટમોર્ટમ કરાવી ગુનો નોંધવા આગળની કાર્યવાહી હાથ ધરવામાં આવી છે.