ફટાકડાની ફેક્ટરીમાં પ્રચંડ વિસ્ફોટ: 23 લોકોના કમકમાટી ભર્યા મોત, અનેક ઘાયલ

Thailand Firecrackers Blast: થાઈલેન્ડના સુફાન બુરી પ્રાંતમાં બુધવારે ફટાકડા બનાવવાની (Thailand Firecrackers Blast) ફેક્ટરીમાં થયેલા વિસ્ફોટમાં 23 લોકોના મોત થયા છે. અધિકારીઓએ જણાવ્યું હતું કે, આ ઘટના રાજધાની બેંગકોકથી લગભગ 60 માઈલ ઉત્તર-પશ્ચિમમાં સ્થિત ફેક્ટરીમાં બની હતી. ઘટનાસ્થળે હાજર બચાવકર્મીઓએ જણાવ્યું કે અકસ્માત સમયે ફેક્ટરીમાં હાજર તમામ લોકોના મોત થયા હતા. અમને કોઈ જીવિત મળ્યું નથી. મૃત્યુઆંક હજુ વધી શકે છે.

સ્થાનિક બચાવકર્મીઓના જણાવ્યા અનુસાર, અકસ્માત સ્થળ ચોખાના ખાલી ખેતરમાં હતું અને બિલ્ડિંગનો કાટમાળ અને શરીરના ભાગો આખા વિસ્તારમાં વિખરાયેલા હતા. આ વિસ્ફોટનું કારણ તાત્કાલિક સ્પષ્ટ થયું નથી. પરંતુ આ ફેબ્રુઆરીમાં આવતા ચીની નવા વર્ષ પહેલા એક મહિના કરતા પણ ઓછો સમય છે. એવું માનવામાં આવે છે કે આ ફટાકડાના ઉત્પાદન સાથે સંબંધિત છે, કારણ કે તે સમયે ફટાકડાની માંગ ઘણી વધારે છે.

An explosion at a fireworks factory in Thailand has killed at least 23 people, officials in the country say: Sky News

— ANI (@ANI) January 17, 2024

બેંગકોકથી લગભગ 120 કિ.મી. ઉત્તરમાં સુફન બુરી સ્થિત એક ફેક્ટરીમાં બપોરે લગભગ 3.30 વાગ્યે વિસ્ફોટ થયો હોવાનું જાણવા મળ્યું છે. આ અકસ્માતમાં લગભગ સાત લોકો ઘાયલ થયા હતા અને તેમને નજીકની હોસ્પિટલમાં લઈ જવામાં આવ્યા હતા. બચાવ કાર્યમાં લાગેલા લોકોના જણાવ્યા અનુસાર, આગ પર કાબૂ મેળવી લેવામાં આવ્યો છે અને બચાવકર્મીઓ જાનહાનિની ​​ચોક્કસ સંખ્યાની પુષ્ટિ કરવાનો પ્રયાસ કરી રહ્યા છે. તસવીરોમાં આગ ઓલવાઈ ગયા બાદ કાળા ધુમાડાના ગોટેગોટા હવામાં ઉછળતા જોવા મળ્યા હતા.