“પહેલા મતદાન કરો, પછી લગ્નમાં પધારશો” અનોખી લગ્ન કંકોત્રી થઇ વાયરલ

ગુજરાત(Gujarat): રાજ્યની વિધાનસભા ચૂંટણી(Gujarat election 2022)ની તારીખો જાહેર થઇ ગઈ છે. તમામ રાજકીય પક્ષો ચુંટણી પ્રચારમાં લાગી ગયા છે. ત્યારે આ વિધાનસભા ચુંટણી દરમિયાન વધુમાં વધુ મતદાન થાય તે માટે મતદાન જાગૃતિના સંદેશા લોકોને આપવામાં આવી રહ્યા છે. ત્યારે આ બધાની વચ્ચે જૂનાગઢ(Junagadh) જિલ્લામાં કંકોત્રીમાં મતદાન જાગૃતિના સંદેશા સાથે અચુક મતદાન કરવા અપીલ કરવામાં આવી રહી છે. આ અંગે જિલ્લા કલેકટર રચિત રાજે જણાવતા કહ્યું છે કે, ચૂંટણીના સમયની આસપાસ ઘણા બધા લગ્નો નિર્ધારિત હોવાથી લગ્નમાં આવો અને મતદાન કરવાની અનેક પરિવારો દ્વારા અપીલ કરવામાં આવી રહી છે. આ દરમિયાન જૂનાગઢના જયંતિભાઇ રવજીભાઇ કાચા પરિવારના ઘરે લગ્ન હોવાને કારણે તેમણે અનોખા પ્રકારની લગ્ન કંકોત્રી પણ છપાવી છે.

આ કંકોત્રીમાં મતદાનનું મહત્વ અને જરૂરિયાત દર્શાવવામાં આવી છે. સાથે 1 ડિસેમ્બરના રોજ પહેલા મતદાન કરો પછી જ લગ્નમાં પધારશો તેવું પણ જણાવી મતદાન જાગૃતિ માટેના પ્રયાસો કરવામાં આવી રહ્યા છે. સાથે જ મતદારોની સંખ્યા વધે તે માટે દરેકને અપીલ પણ કરવામાં આવી રહી છે.

સાથે જ લગ્ન કંકોત્રીમાં એવું પણ લખવામાં આવ્યું છે કે, હું તમને અપીલ કરૂં છું કે, આપનો કિંમતી મત આપીને લોકશાહીને મજબૂત બનાવો. અવસર લોકશાહીનો, અવસર મતદાનનો હોય ત્યારે મતદાન કરો અને તમે પણ લોકશાહીના સિંહ બનો. શું તમે તૈયાર છો? આ રીતે તદ્દન અનોખા અંદાજમાં જ લગ્ન કંકોત્રી બનાવી મતદાન વધારવા માટેનો પ્રયાસ કરવામાં આવ્યો છે.