હીરા ઉદ્યોગને મોટી રાહત આપતી સરકાર : જોબવર્ક પર ચાર્જ ૫%થી ઘટી 1.50 % ટકા

જોબવર્કના દરોને લઈને છેલ્લાં ઘણાં સમયથી ભારે મુશ્કેલીનો સામનો કરતા હીરાઉદ્યોગને આજે એક મોટી રાહત સરકારે જીએસટીના દરમાં ઘટાડો કરીને આપી છે. જોબવર્કનો દર પાંચ ટકા હોવાને કારણે કારખાનેદારોનું ફંડ બિનજરૃરી રીતે બ્લોક થતું હતું. જોકે જોબવર્કનો દર 1.50 ટકા કરાતાં કારખાનેદારોએ હાશકારો અનુભવ્યો છે. જોબવર્કના દરના ઘટાડાના સરકારના પગલાંને ચેમ્બર ઓફ કોમર્સે આવકાર્યું છે.

પ્રમુખ કેતન દેસાઈએ જણાવ્યું કે, જોબવર્કના ઊંચા દરોને કારણે રિફંડ જનરેટ થતું હતું.1.50 ટકા દર થવાથી હવે આ સમસ્યા નહીં રહે. હીરાઉદ્યોગને સરકારે એક મોટી રાહત કરી આપી છે. આ ઉપરાંત સરકારે હોટલ ઈન્ડસ્ટ્રીઝને પણ રાહત કરી આપી છે. શહેરના વેપાર-ઉદ્યોગને પરેશાન કરતા જીએસટીના પ્રશ્નોના નિરાકરણ માટેની સરકાર સમક્ષ કરાયેલી ભારપૂર્વકની રજૂઆતનું આખરે પરિણામ મળ્યું હોવાનું સૌ કોઈ અનુભવી રહ્યાં છે.