અફઘાનિસ્તાનની સરકાર મોટા માથાઓના હાથમાં: મુલ્લા બરાદાર નહિ પરંતુ, આ તાલીબાની બનશે વડાપ્રધાન

યુએન આતંકવાદીઓની યાદીમાં સમાવિષ્ટ તાલિબાનના નેતા મુલ્લા હસન અખુંદ અફઘાનિસ્તાનના આગામી વડાપ્રધાન બની શકે છે. ઉગ્રવાદી જૂથના ઘણા જૂથો વચ્ચેના મતભેદોએ અત્યાર સુધી યુદ્ધગ્રસ્ત રાષ્ટ્રમાં સરકારની રચનામાં અવરોધ ઊભો કર્યો છે. ત્રણ સપ્તાહ પહેલા તાલિબાન દ્વારા કાબુલ પર કબજો કરવામાં આવ્યો હતો. મુલ્લા બરદારની આગેવાની હેઠળના તાલિબાનના દોહા એકમ, પૂર્વી અફઘાનિસ્તાનથી કાર્યરત આતંકવાદી સંગઠન હક્કાની નેટવર્ક અને તાલિબાનમાં કંદહાર જૂથમાં સત્તા પર મતભેદો છે, જેનાથી અફઘાનિસ્તાનમાં સરકારની રચનામાં વિલંબ થાય છે.

સૂત્રોના જણાવ્યા અનુસાર, નવા ફોર્મ્યુલા હેઠળ મુલ્લા બરાદાર અને મુલ્લા ઉમરનો પુત્ર મુલ્લા અખુંદના ડેપ્યુટી તરીકે સેવા આપી શકે છે. હક્કાની નેટવર્કના સિરાજ હક્કાનીને ભારતના ગૃહ મંત્રાલય જેટલું શક્તિશાળી ગૃહ મંત્રાલયના વડા તરીકે પસંદ કરી શકાય છે. તાલિબાનના ટોચના મૌલવી અને નેતા હિબતુલ્લા અખુંદઝાદા ‘સર્વોચ્ચ નેતા’ બને ​​તેવી શક્યતા છે.

મુલ્લા હસન અખુંદ તાલિબાનની નેતૃત્વ પરિષદ “રહબારી શુરા” ના વડા છે અને 2001 માં અમેરિકા સાથે યુદ્ધ શરૂ થાય તે પહેલા તાલિબાન અંકુશિત અફઘાનિસ્તાનમાં મંત્રી તરીકે સેવા આપી હતી. એવી અટકળો છે કે ગયા અઠવાડિયે પાકિસ્તાનની ગુપ્તચર એજન્સી આઈએસઆઈના વડા કાબુલ ગયા ત્યારે આ સમજૂતી થઈ હતી. હવે ISI ચીફ ફૈઝ હમીદ હવે ઈસ્લામાબાદમાં પાછો ફર્યો છે.

પૂર્વ રાષ્ટ્રપતિ હામિદ કરઝાઈ અને પૂર્વ વિદેશ મંત્રી અબ્દુલ્લા અબ્દુલ્લા સહિત દેશના ભૂતપૂર્વ નેતાઓ કાબુલ પર કબજો મેળવ્યા બાદ તાલિબાન સાથે વાતચીત કર્યા પછી પણ કોઈ ભૂમિકા ભજવતા નથી.