સયાજી હોસ્પિટલ ફરી વિવાદમાં: પેરાલિસિસ પીડિત મહિલા દર્દીના મોઢા પર ચડી ગઈ કીડીઓ અને…

વડોદરા(ગુજરાત): તાજેતરમાં વડોદરામાંથી એક ચકચાર મચાવતો બનાવ સામે આવ્યો છે. છેલ્લા ઘણા દિવસોમાં અનેક વાર સયાજી હોસ્પિટલ વિવાદમાં આવી છે ત્યારે ફરીવાર સયાજી હોસ્પિટલના કોવિડ વોર્ડમાં વધુ એક લાલિયાવાડી આવી સામે આવી છે. જેમાં પેરાલિસિસથી પીડિત કોરોનાગ્રસ્ત મહિલા દર્દીના મોઢા પર કીડીઓ ફરતી જોવા મળી હતી.

પત્નીના ચહેરા પર કીડીઓ ફરતી જોતાં પતિ ચોંકી ઊઠ્યો હતો. પતિએ વીડિયો ઉતારીને વાઇરલ કરતાં આ સમગ્ર મામલાનો ખુલાસો થયો હતો. સયાજી હોસ્પિટલના સુપરિન્ટેન્ડેન્ટ ડો. રંજન ઐયરે આ અંગે જણાવ્યું હતું કે, આ અંગે હજી સુધી મને કોઇ ફરિયાદ મળી નથી. જેવી ફરિયાદ મળશે એટલે તપાસ કરીશું.

વડોદરા શહેરની સયાજી હોસ્પિટલ તંત્રની અમાનવીય બેદરકારી બહાર આવતાં દર્દીઓમાં ભારે રોષ જોવા મળ્યો છે. જાણવા મળ્યું છે કે, ભરૂચ જિલ્લાના જંબુસરનાં દર્દી ગીતાબેન પાડલીયા પેરાલિસિસની બીમારીથી પીડાય છે. જેથી તેમને કોરોનાની સારવાર માટે વડોદરાની સયાજી હોસ્પિટલમાં સારવાર માટે ખસેડવામાં આવ્યાં હતાં.

અહી મહિલા દર્દીના મોઢા પર કીડીઓ ફરતી હોવા છતાં તબીબો કે નર્સિંગ સ્ટાફ દ્વારા કોઇ સંભાળ લેવામાં આવી નહોતી. આ દરમિયાન મહિલા દર્દીનો પતિ પ્રમોદભાઈ પાડલીયા જ્યારે વોર્ડમાં તેની ખબર પૂછવા ગયો ત્યારે તેના મોઢા પર કીડીઓ ફરતી જોઇને તે પણ ચોંકી ઊઠ્યો હતો અને તરત જ આ અંગે નર્સિંગ સ્ટાફને જાણ કરી હતી. ત્યારબાદ મહિલા દર્દીના મોઢા પરથી કીડીઓ હટાવવામાં આવી હતી.