November 02, 2024
ICC fined India and Australia for slow over rate in WTC final: ફાઈનલ મેચમાં ઓસ્ટ્રેલિયા અને ભારત (Australia Vs India) બંને ટીમોએ મોટાભાગની ઓવર ફાસ્ટ બોલરોએ કરી હતી. બંને ટીમોએ આનો માર સહન કરવો પડ્યો છે. પાંચ દિવસ સુધી મેદાનમાં પરસેવો પાડનારા ભારતીય ખેલાડીઓને ફી તરીકે એક રૂપિયો પણ નહીં મળે.
વર્લ્ડ ટેસ્ટ ચેમ્પિયનશિપની ફાઇનલમાં હાર બાદ ભારતીય ટીમ માટે વધુ એક ખરાબ સમાચાર છે. ICCએ સ્લો ઓવર રેટ માટે ટીમ ઈન્ડિયાની સમગ્ર મેચ ફી કાપી લીધી છે. ICCની તમામ ટ્રોફી જીતનારી પ્રથમ ટીમ બન્યા બાદ જશ્ન મનાવી રહેલી ઓસ્ટ્રેલિયાને પણ આંચકો લાગ્યો છે. ICCએ ઓસ્ટ્રેલિયન ખેલાડીઓની મેચ ફીમાંથી 80 ટકા રકમ કાપી લીધી છે.
ફાઇનલ મેચ દરમિયાન, બંને ટીમોએ મોટાભાગની ઓવરો તેમના ઝડપી બોલરો દ્વારા કરવામાં આવી હતી. આ કારણોસર, આ મેચમાં કોઈપણ દિવસે સંપૂર્ણ 90 ઓવર રમી શકાઈ ન હતી. મેચ બાદ ICCએ બંને ટીમો સામે કાર્યવાહી કરી છે. ભારતીય ખેલાડીઓને તેમની મેચ ફીના 100 ટકા અને ઓસ્ટ્રેલિયાને 80 ટકા દંડ ફટકારવામાં આવ્યો છે.
Trending News
ભારતીય ટીમ પર 100 ટકા અને ઓસ્ટ્રેલિયા પર 80 ટકા દંડ
ભારતીય ટીમ સમયપત્રક મુજબ પાંચ ઓવર પાછળ હતી જ્યારે ઓસ્ટ્રેલિયન ટીમ ચાર ઓવર પાછળ હતી. ખેલાડીઓ અને સહાયક કર્મચારીઓ માટેની ICC કોડ ઓફ કન્ડક્ટની કલમ 2.22 અનુસાર, જ્યારે ટીમ નિર્ધારિત સમયમાં તેની ઓવર પૂરી કરવામાં નિષ્ફળ જાય તો ખેલાડીઓને ફેંકવામાં આવેલી દરેક ઓવર માટે તેમની મેચ ફીના 20 ટકા દંડ કરવામાં આવે છે. પાંચ ઓવર પાછળ હોવાને કારણે ભારતીય ટીમની સમગ્ર મેચ ફી કાપવામાં આવી છે. તે જ સમયે, ઓસ્ટ્રેલિયાને મેચ ફીના 80 ટકા દંડ ફટકારવામાં આવ્યો છે.
શુભમન ગિલ પર 115 ટકા દંડ
ભારતના શુભમન ગિલને ટેસ્ટના ચોથા દિવસે આઉટ કરવાના વિવાદાસ્પદ નિર્ણયની ટીકા કરવા બદલ વધુ એક દંડનો સામનો કરવો પડશે. ગિલે ICC કલમ 2.7નો ભંગ કર્યો છે, જે આંતરરાષ્ટ્રીય મેચમાં બનતી ઘટનાના સંબંધમાં જાહેર ટીકા અથવા અયોગ્ય ટિપ્પણી સાથે સંબંધિત છે. શુભમન ગિલને મેચ ફીના 15 ટકા દંડ ફટકારવામાં આવ્યો છે. ટીમની ધીમી ઓવર રેટ અને તેને આઉટ કરવાના નિર્ણયનો વિરોધ કરવા બદલ ગીલને બે વખત દંડ ફટકારવામાં આવ્યો છે, કુલ દંડ તેની મેચ ફીના 115 ટકા જેટલો થઈ ગયો છે.
આવી સ્થિતિમાં, તેણે તેની મેચ ફીના 15 ટકા ICCને ચૂકવવા પડશે અને કોઈપણ ભારતીય ખેલાડીને આ મેચની ફી મળશે નહીં. ટેલિવિઝન અમ્પાયર રિચાર્ડ કેટલબરોએ ગ્રીનના કેચને ન્યાયી ગણાવ્યા બાદ ગિલને આઉટ જાહેર કર્યો. આના પર ગિલે ઇન્સ્ટાગ્રામ પર અમ્પાયરના નિર્ણયની ટીકા કરી હતી. આ કારણસર તેને દંડ ફટકારવામાં આવ્યો છે.
આ મેચમાં ઓસ્ટ્રેલિયાએ ભારત સામે 444 રનનો લક્ષ્યાંક રાખ્યો હતો. જવાબમાં ટીમ ઈન્ડિયા મેચના પાંચમા દિવસે પહેલા સેશનમાં 234 રન પર સમેટાઈ ગઈ હતી અને 209 રનથી મેચ હારી ગઈ હતી. ભારતે સતત બીજી વખત વર્લ્ડ ટેસ્ટ ચેમ્પિયનશિપની ફાઇનલમાં હારનો સામનો કરવો પડ્યો છે.
નીચે આપેલી લીંક પર ક્લિક કરીને જોડાઓ ત્રિશુલ ન્યૂઝ Trishul News સાથે. અમારું ફેસબુક પેજ લાઈક કરો અને ફોન પર અપડેટ્સ મેળવતા રહો. વોટ્સેપ પર સમાચાર મેળવવા અહીં ક્લિક કરો.