ટીમ ઇન્ડિયાને લાગ્યો ડબલ ઝટકો- હાર પછી પણ ICC એ ફટકાર્યો મસમોટો દંડ, જાણો કઈ ભૂલ માથે પડી

ICC fined India and Australia for slow over rate in WTC final: ફાઈનલ મેચમાં ઓસ્ટ્રેલિયા અને ભારત (Australia Vs India) બંને ટીમોએ મોટાભાગની ઓવર ફાસ્ટ બોલરોએ કરી હતી. બંને ટીમોએ આનો માર સહન કરવો પડ્યો છે. પાંચ દિવસ સુધી મેદાનમાં પરસેવો પાડનારા ભારતીય ખેલાડીઓને ફી તરીકે એક રૂપિયો પણ નહીં મળે.

વર્લ્ડ ટેસ્ટ ચેમ્પિયનશિપની ફાઇનલમાં હાર બાદ ભારતીય ટીમ માટે વધુ એક ખરાબ સમાચાર છે. ICCએ સ્લો ઓવર રેટ માટે ટીમ ઈન્ડિયાની સમગ્ર મેચ ફી કાપી લીધી છે. ICCની તમામ ટ્રોફી જીતનારી પ્રથમ ટીમ બન્યા બાદ જશ્ન મનાવી રહેલી ઓસ્ટ્રેલિયાને પણ આંચકો લાગ્યો છે. ICCએ ઓસ્ટ્રેલિયન ખેલાડીઓની મેચ ફીમાંથી 80 ટકા રકમ કાપી લીધી છે.

ફાઇનલ મેચ દરમિયાન, બંને ટીમોએ મોટાભાગની ઓવરો તેમના ઝડપી બોલરો દ્વારા કરવામાં આવી હતી. આ કારણોસર, આ મેચમાં કોઈપણ દિવસે સંપૂર્ણ 90 ઓવર રમી શકાઈ ન હતી. મેચ બાદ ICCએ બંને ટીમો સામે કાર્યવાહી કરી છે. ભારતીય ખેલાડીઓને તેમની મેચ ફીના 100 ટકા અને ઓસ્ટ્રેલિયાને 80 ટકા દંડ ફટકારવામાં આવ્યો છે.

ભારતીય ટીમ પર 100 ટકા અને ઓસ્ટ્રેલિયા પર 80 ટકા દંડ
ભારતીય ટીમ સમયપત્રક મુજબ પાંચ ઓવર પાછળ હતી જ્યારે ઓસ્ટ્રેલિયન ટીમ ચાર ઓવર પાછળ હતી. ખેલાડીઓ અને સહાયક કર્મચારીઓ માટેની ICC કોડ ઓફ કન્ડક્ટની કલમ 2.22 અનુસાર, જ્યારે ટીમ નિર્ધારિત સમયમાં તેની ઓવર પૂરી કરવામાં નિષ્ફળ જાય તો ખેલાડીઓને ફેંકવામાં આવેલી દરેક ઓવર માટે તેમની મેચ ફીના 20 ટકા દંડ કરવામાં આવે છે. પાંચ ઓવર પાછળ હોવાને કારણે ભારતીય ટીમની સમગ્ર મેચ ફી કાપવામાં આવી છે. તે જ સમયે, ઓસ્ટ્રેલિયાને મેચ ફીના 80 ટકા દંડ ફટકારવામાં આવ્યો છે.