ગુજરાત: 65 વર્ષીય વૃદ્ધ નાડાથી હાથ-પગ ખાટલા સાથે બાંધીને મોઢે ડૂમો દઈને કરી નાખી નિર્મમ હત્યા 

આજકાલ વધતા હત્યાના કિસ્સા દરમિયાન ફરીવાર દેવપુરામાં 65 વર્ષીય વૃદ્ધને અજાણ્યા શખસોએ ખાટલામાં નાડા વડે હાથ-પગ બાંધી મોઢે ડૂમો દઇ પતાવી દેતાં નાના એવા ગામમાં હોબાળો મચી જવા પામ્યો છે. ઘટનાની જાણ થતાં જ જસદણ પોલીસ દોડી ગઈ છે અને તપાસ હાથ ધરવામાં આવી છે.

મળતી માહિતી મુજબ, જસદણ તાલુકાના દેવપુરા ગામે માવજીભાઇ વાસાણી (ઉં.વ.65)ની ગઈકાલે રાત્રે અજાણ્યા શખસો દ્વારા હત્યા નીપજાવી ફરાર થઇ ગયા છે. જાનવ મળ્યું છે કે, સવારે માવજીભાઇનો મૃતદેહ તેમના મકાનની ઓસરીમાં રાખેલા ખાટલામાં નાડાથી બાંધેલી હાલતમાં મળી આવ્યો હતો. આથી પરિવારજનો દ્વારા જસદણ પોલીસને જાણ કરવામાં આવી હતી. પોલીસ ઘટનાસ્થળે પહોંચી માવજીભાઇના મૃતદેહને પોસ્ટમોર્ટમ માટે હોસ્પિટલ ખસેડવાની તજવીજ હાથ ધરવામાં આવી છે.

જાણવા મળ્યું છે કે, માવજીભાઇ દેવપુરા ગામમાં રહેતા હતા તેમજ દાઝેલા લોકોને મલમ લગાડી દેવાનું કામ કરતા હતા. માવજીભાઇની હત્યાથી નાના એવા ગામમાં શોકનો માહોલ છવાયો છે. માવજીભાઇની હત્યા શા માટે અને કોણે કરી એ દિશામાં પોલીસ દ્વારા તપાસ હાથ ધરવામાં આવી છે. હત્યા કરનાર શખસોને માવજીભાઇ સાથે શું સંબંધ છે એ તપાસના અંતે બહાર આવશે.